اقتوتى رايىمقۇلوۆا قاراعاندى وبلىسىنداعى بىرقاتار سپورت كەشەندەرىن ارالادى

5104
Adyrna.kz Telegram
 19 قىركۇيەك كۇنى قاراعاندىدا قازاقستان ۇستەل تەننيسىنەن الەمدىك دەڭگەيدە تۇڭعىش رەت وتكەن «ITTF Kazakhstan International Open-2021» حالىقارالىق تۋرنيرىنە قر مادەنيەت جانە سپورت ءمينيسترى اقتوتى راحمەتوللاقىزى ارنايى قاتىسىپ، قاراعاندى وڭىرىندەگى بىرقاتار سپورت كەشەندەرىنىڭ دامۋ بارىسىمەن تانىسىپ قايتتى، دەپ حابارلايدى "ادىرنا" ۇلتتىق پورتالىنىڭ ءتىلشىسى.
ءىس-ساپار بارىسىندا مادەنيەت جانە سپورت ءمينيسترى اقتوتى راحمەتوللاقىزى، قاراعاندى وبلىسى اكىمىنىڭ ورىنباسارى ابزال نۇكەنۇلى، قاراعاندى وبلىسىنىڭ سپورت باسقارماسىنىڭ باسشىسى تەمىرحان سەرىكبايۇلىمەن بىرگە قاراعاندى قالاسىندا ورنالاسقان بىرنەشە سپورتتىق نىساندارىن ارالاپ، ونداعى جاتتىقتىرۋشىلار مەن مەكەمە قىزمەتكەرلەرىمەن كەزدەستى. كەزدەسۋ بارىسىندا شەشىمى تابىلماعان كوپتەگەن ماسەلەر ايتىلىپ، الداعى اتقارىلۋى ءتيىس جۇمىس جوسپارى تالقىلاندى.

- قاراعاندى – دەنە شىنىقتىرۋ مەن سپورت سالاسىن دامىتۋ جولىندا وزىندىك ورنى بار قالا. بيىل كۇللى الەمدى ابىگەرگە سالعان سىندارلى كەزەڭگە قاراماستان العا قويعان بىرقاتار ماڭىزدى مىندەتتى ابىرويمەن ورىندادىق. بارشالارىڭىزعا بەلگىلى پرەزيدەنتىمىز قاسىم-جومارت كەمەلۇلى جولداۋىندا بۇقارالىق سپورتقا باسا نازار اۋدارىپ، ەلىمىزدەگى جاستارمەن قاتار بارشا جۇرتتى سپورتقا باۋلۋ كەرەكتىگىن ايتقان بولاتىن. اتالعان ماسەلەگە بايلانىستى ءىس-ساپارمەن كەلگەن قوناقتارىمىزعا الداعى ۋاقىتتا اتقارىلاتىن جۇمىس جوسپارىمىزدى تانىستىردىق - دەدى قاراعاندى وبلىسى اكىمىنىڭ ورىنباسارى ابزال نۇكەنۇلى.
سونداي-اق وبلىس اكىمىنىڭ ورىنباسارى بالالاردىڭ سپورتپەن اينالىسۋ ۇيىرمەلەرىنە ارنايى قارجىلاندىرۋ، كومەك كورسەتۋ اياسىندا وبلىس بويىنشا 1 ملرد-تان استام قاراجات كوزدەلگەنىن اتاپ ءوتتى.

- بۇل قازاقستان بويىنشا ەڭ جوعارى كورسەتكىش. وعان بايلانىستى الداعى ۋاقىتتا 8 مىڭ بالانى قامتۋ جوسپارلانىپ وتىر. ودان بولەك بۇقارالىق سپورت پەن سپورتتىق ينفوقۇرىلىمدى دامىتۋ بويىنشا 1,5 جىل بۇرىن ارنايى جول كارتاسى قابىلدانعان بولاتىن. سوعان سايكەس، بۇگىنگى كۇنى وڭىرلەردە، اسىرەسە اۋىلدى جەرلەردە، ءار اۋلادا، ءار كوشەدە قولجەتىمدى سپورت ينفوقۇرىلىمىن دامىتۋ بويىنشا جۇمىستار اتقارىلىپ جاتىر. جالپى وبلىس بويىنشا ءتۇرلى دەڭگەيدە جابدىقتالعان 3 مىڭنان استام سپورت ورىندارى بار، - دەيدى ا. نۇكەنۇلى.

سونىمەن قاتار وبلىس اكىمىنىڭ ورىنباسارى ءىس-ساپار كەزىندە مينيسترگە قاراعاندى وبلىسىندا سالىنىپ جاتقان بىرقاتار سپورت كەشەندەرى جايلى تارقاتىپ ايتتى.

- بۇگىنگى كۇنى وبلىس بويىنشا سپورت كەشەندەرى قارقىندى دامۋدا. قازىردىڭ وزىندە ءوڭىر كولەمىندە ساۋىقتىرۋ كەشەندەرىنىڭ سانى 20-دان استى. بىلتىر تەمىرتاۋ، شاحتينسك، اباي، قارقارالىدا بىرنەشە سپورت وبەكتىلەرى، سودان كەيىن وسى قاراعاندىدا ۇلكەن تەننيس ورتالىعى اشىلدى. ونىڭ بارلىعى بۇگىندە حالىق يگىلىگىنە، بالالاردىڭ يگىلىگىنە جۇمىس ىستەۋدە. ودان بولەك 8 سپورتتىق كەشەننىڭ قۇرىلىسى ءجۇرىپ جاتىر. قازىرگى كەزدە شاحتينسكىدە، قارساقبايدا، نۇرا، ۇلىتاۋ اۋدانىندا، بوتاقارا، جاڭاارقا سىندى اۋىلدىق ەلدى-مەكەندەردە ۇلكەن سپورت كەشەندەرى، باسسەين مەن حوككەي كورتى سالىنۋدا، - دەدى ا. نۇكەنۇلى.

ودان بولەك ابزال نۇكەنۇلى بارلىق جاستاعى ەل ازاماتتارى اراسىندا ۇلتتىق سپورتتى دامىتۋعا ايرىقشا نازار اۋدارىپ كەلە جاتقانىنا توقتالدى.

- ۇلتتىق سپورتقا كوپ كوڭىل ءبولىپ جاتىرمىز. قاراعاندى باسىنان ۇلكەن اتشابار يپپودرومعا جەر بولىنگەن. وتكەندە عانا سول جەردە بايگە وتكىزدىك. ءبىزدىڭ قاۋىمداستىق قازىر ۇلتتىق سپورت باعىتى بويىنشا كۇشەيىپ جاتىر. كوكپاردان جىگىتتەر  قازاقستان دەڭگەيىندە جاقسى ۇيىمداسىپ، 2 - ورىن الىپ كەلگەن بولاتىن. بولاشاقتا سول جەردە ۇلكەن يپپودروم سالامىز دەگەن ويىمىز بار. الداعى ۋاقىتتا وزىمىزگە جاقىن ۇلتتىق سپورت ءتۇرى - ات سپورتىن دامىتۋ بويىنشا جۇمىستى كۇشەيتەتىن بولامىز. اتقارىلاتىن جۇمىس بار. جوسپارلار كوپ، - دەپ تولىقتىردى وبلىس اكىمىنىڭ ورىنباسارى ا. نۇكەنۇلى.
ايتا كەتەيىك، 15-19 قىركۇيەك ارالىعىندا قاراعاندىداعى Saryarka ۇستەل تەننيسىنىڭ جاڭا ورتالىعىندا قازاقستان ۇستەل تەننيسىنەن «ITTF Kazakhstan International Open-2021» حالىقارالىق ءتۋرنيرى تۇڭعىش رەت ءوتىپ، الەمدىك دەڭگەيدە وتكىزىلگەن بولاتىن. جارىسقا اۋستريا، ساۋد ارابياسى، ءۇندىستان، بەلارۋس، رەسەي، وزبەكستان، قىرعىزستان جانە قازاقستان ەلدەرىنەن 70-تەن استام سپورتشى قاتىستى.  جۇلدە قورى 30 مىڭ اقش دوللارىن قۇرايتىن ايتۋلى جارىس تمد ەلدەرى اۋماعىنداعى حالىقارالىق ۇستەل تەننيسى فەدەراتسياسىنىڭ (ITTF) بيىلعى جىلعى جالعىز رەيتينگتىك ءتۋرنيرى اتاندى.
زارينا اشىربەك،
"ادىرنا" ۇلتتىق پورتالى
پىكىرلەر