قاراعاندىدا، «كەڭدالا» شاعىن اۋدانىندا 1 قىركۇيەكتە 2000 ورىنعا ەسەپتەلگەن العاشقى جايلى مەكتەپ اشىلدى.
بۇل قالانىڭ وڭتۇستىك-شىعىس بولىگىندەگى ءتورت مەكتەپتەگى جۇكتەمەنى تومەندەتۋگە مۇمكىندىك بەرەدى.
ءبىرىنشى كەزەكتە مۇندا ءاليحان ەرمەكوۆ اتىنداعى مەكتەپ-ليتسەيىنىڭ وقۋشىلارى كوشىپ كەلدى.
اشىلۋ سالتاناتىنا قاراعاندى وبلىسىنىڭ اكىمى ەرماعانبەت بولەكپاەۆ پەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قاتىستى.
– ءبىرىنشى قىركۇيەك – سىزدەردى جاڭا ءبىلىم الەمىنە جەتەلەيتىن كەزەڭنىڭ باستاماسى. ءبىلىم مەن عىلىم – تابىسقا جەتۋدىڭ باستى كىلتى. جاس ۇرپاققا جايلى، ساپالى ءبىلىم بەرۋ ءۇشىن قولايلى جاعدايلار جاساۋ – ءبىزدىڭ باستى ماقساتىمىز. وسى جايلى مەكتەپتىڭ قابىرعاسىندا سىزدەردى قىزىقتى ءارى ادەمى بولاشاق كۇتىپ تۇرعانىنا سەنىمدىمىن! – دەدى ايماق باسشىسى.
– مەن سىزدەرمەن وسىنداي ەرەكشە كۇنى بىرگە بولعانىما وتە قۋانىشتىمىن. مەملەكەت باسشىسىنىڭ تىكەلەي تاپسىرماسى بويىنشا باستاماشىلىق جۇزەگە اسىرىلىپ جاتقان «جايلى مەكتەپ» جوباسى اپاتتى مەكتەپتەردى جويۋعا، وقۋشى ورىندارىنىڭ تاپشىلىعىن ەڭسەرۋگە جانە جايلى ءبىلىم بەرۋ پروتسەسىن قامتاماسىز ەتۋگە باعىتتالعان، – دەپ اتاپ ءوتتى مينيستر. – سىزدەردىڭ مەكتەپتەرىڭىز جاي عانا جاڭا عيمارات ەمەس. بۇل دامۋ مەن وقۋ ءۇشىن تاماشا جاعدايلار جاسالعان ورىن.
جايلى مەكتەپكە كونكۋرس بويىنشا 150 مۇعالىم جۇمىسقا قابىلداندى.
العاشقى كۇندەردەن باستاپ وقۋشىلار مەن پەداگوگتار «جايلى مەكتەپتەر» ۇلتتىق جوباسىنىڭ ستاندارتتارى بويىنشا جاڭا فورماتتىڭ ارتىقشىلىقتارىن باعالايدى.
باستاۋىش جانە جوعارى سىنىپ وقۋشىلارى ءۇشىن وقۋ كابينەتتەرى، سانيتارلىق توراپتار مەن سپورت زالدارى بار جەكە بلوكتار قاراستىرىلعان. ىڭعايلى جانە قاۋىپسىز بولۋ ءۇشىن التى كىرەبەرىس پەن شىعاتىن ەسىكتەر جاسالدى.
كابينەتتەر مەن زەرتحانالار موديفيكاتسيالانعان، ەڭ زاماناۋي تالاپتارعا ساي جابدىقتالعان. جيھاز ەرگونوميكالىق.
– بىزگە وقۋ ىڭعايلى ءارى قىزىقتى بولۋى ءۇشىن بارلىق جاعداي جاسالعان. ماعان ءار قاباتتا كوۆوركينگ ايماعىنىڭ بارى ۇنايدى. مەكتەپتە ءتورت سپورت زالى بار. بۇل سپورتقا كوپ كوڭىل بولىنەتىنىن بىلدىرەدى، – دەپ ءبولىستى ونىنشى سىنىپ وقۋشىسى دينا جۇماباي.
