31 ناۋرىز كۇنى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەلدەگى سۋ تاسقىنىنا قاتىستى ءبىرىنشى رەت ءۇن قاتتى، دەپ حاباردايدى “ادىرنا” ۇلتتىق پورتالى.
ول سۋ رەسۋرستارى جانە يرريگاتسيا مينيسترلىگى قازىر جەرگىلىكتى اتقارۋشى ورگاندارمەن بىرلەسىپ، ستراتەگيالىق نىسانداردىڭ قاۋىپسىزدىگى قامتاماسىز ەتۋ، سۋ قويمالارىنا تاسقىن سۋىن جيناۋ جانە ونى قاۋىپسىز وتكىزۋ ءۇشىن جۇمىس ىستەپ جاتقانىن جەتكىزدى.
«بۇگىندە ەلىمىزدىڭ وڭتۇستىگىندەگى سۋ قويمالارى سۋارۋ كەزەڭىنە دايىندالۋدا. ورتالىق، سولتۇستىك، باتىس جانە شىعىس وڭىرلەردە تاسقىن سۋىن قاۋىپسىز وتكىزۋ ءىس-شارالارى جۇرگىزىلىپ جاتىر. سۋ قويمالارىنىڭ جۇمىس كەستەسى تۋرالى توتەنشە جاعدايلار دەپارتامەنتتەرى مەن جەرگىلىكتى اكىمدىكتەر ساعات سايىن حاباردار ەتىلەدى. قازىرگى كەزدە بۇل ايماقتارداعى سۋ قويمالارى 40%-عا بوس جانە 22,7 تەكشە شاقىرىم سۋ قابىلداي الادى. مىسالى، اقتوبە سۋ قويماسىنا ەكى تاۋلىك ىشىندە (27-29 ناۋرىز ارالىعىندا) سۋ قويماسىنىڭ جالپى كولەمىنىڭ 75%-نان استام نەمەسە 200 ملن تەكشە مەتر سۋ ءتۇستى. توتەنشە جاعدايدىڭ الدىن الۋ جانە حالىقتى ۋاقتىلى ەۆاكۋاتسيالاۋ ءۇشىن سۋ قويماسىندا ەڭ جوعارى دەڭگەيدەن 15 ميلليون تەكشە مەتر ارتىق سۋ جيناۋ تۋرالى شەشىم قابىلداندى. قازىرگى ۋاقىتتا اقتوبە سۋ قويماسىنداعى سۋ دەڭگەيى تۇراقتى. جەدەل دەن قويۋ ماقساتىندا ءبىز ۇزدىكسىز مونيتورينگ جۇرگىزەمىز جانە اكىمدىكتەر مەن تجد-نى حاباردار ەتەمىز. توبىل-تورعاي باسسەينىنىڭ (قوستاناي وبلىسى) ءىرى سۋ قويمالارى تاعى 550 ملن تەكشە مەتردەن استام سۋ قابىلداي الادى»، - دەدى نۇرجان نۇرجىگىتوۆ.
مينيستر ءوز كەزەگىندە قازىرگى كەزدە سۋ قويمالارىنىڭ جۇمىس كەستەسى بەكىتىلگەنىن، جاۋاپتى مەكەمە قىزمەتكەرلەرى اتالعان وبەكتىلەرگە تاۋلىك بويى باقىلاۋ جۇرگىزەتىنىن اتاپ ءوتتى.
«قازىرگى ۋاقىتتا سۋ تاسقىنى ايماقتارىندا مينيسترلىكتىڭ 1000-نان استام مامانى مەن 280-نەن استام تەحنيكا جۇمىلدىردى. سۋ شارۋاشىلىعى نىساندارىندا تاۋلىك بويى كەزەكشىلىك ۇيىمداستىرىلعان. سۋ تاسقىنىنا قارسى ءىس-شارالارعا ارنالعان قور، سونىڭ ىشىندە قۇم، قيىرشىق تاس، قاپشىقتار جانە باسقا دا قاجەتتى ينەرتتى ماتەريالدار دايىندالدى. مينيسترلىك جانىنداعى جەدەل شتاب اكىمدىكتەرمەن ءوزارا تىعىز بايلانىس ورناتتى. رەسپۋبليكالىق مەنشىكتەگى بارلىق گيدروتەحنيكالىق قۇرىلىستاردا تاسقىن سۋىن اپاتسىز وتكىزۋ جونىندە ءىس-شارالار جوسپارى مەن سۋ قويمالارىنىڭ جۇمىس كەستەسى بەكىتىلدى. جاۋاپتى مەكەمە قىزمەتكەرلەرى وبەكتىلەرگە تاۋلىك بويى باقىلاۋ جۇرگىزەدى.
ايتا كەتۋ كەرەك، مينيسترلىك، توتەنشە جاعدايلاردىڭ سالدارىن ازايتۋ ءۇشىن جۇمىس ىستەپ تۇرعان 15 سۋ قويماسىن رەكونسترۋكتسيالاۋدى جوسپارلاپ وتىر. بۇل سۋ تاسقىنى كەزىندە 75 مىڭنان استام حالقى بار 60-تان استام اۋىلدىق ەلدىمەكەندى سۋ باسۋ قاۋپىنىڭ الدىن الۋعا مۇمكىندىك بەرەدى. ءبىز سۋ شارۋاشىلىعى نىساندارىنىڭ ءتيىستى جاي-كۇيىن قامتاماسىز ەتە وتىرىپ، ەرىگەن قار سۋىن جيناۋعا، سونداي-اق ونى قاۋىپسىز وتكىزۋدى قامتاماسىز ەتۋ ءۇشىن بار كۇش-جىگەرىمىزدى سالامىز»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ايتا كەتسەك، نۇرجان نۇرجىگىتوۆ 2023 جىلدىڭ قىركۇيەگىندە سۋ رەسۋرستارى جانە يرريگاتسيا ءمينيسترى بولىپ تاعايىندالدى. مينيستر بولعانىنا جىل تولماعان نۇرجىگىتوۆ 30 ناۋرىزدا پرەزيدەنتتەن قاتاڭ سوگىس الىپ ۇلگەردى. سونداي-اق، كەشە ول 57 جاسقا تولدى.
