كومپانيا قورعانىش كيىمىن ۋاقىتىلى جەتكىزبەگەندىكتەن، مەديتسينا قىزمەتكەرلەرى جاپپاي اۋرۋعا شالدىققان. بىلتىر ناۋرىز بەن مامىر ارالىعىندا الماتىدا 160 مەديتسينا قىزمەتكەرى جۇمىستا ءجۇرىپ كوروناۆيرۋس جۇقتىرعان. بۇل تۋرالى الماتى قالاسىنىڭ سانيتارلىق-ەپيدەميولوگيالىق دەپارتامەنتىنىڭ باسشىسى جانداربەك بەكشين سوتتا حاباردار ەتتى، دەپ حابارلايدى “ادىرنا” ۇلتتىق پورتالى «حابار24» ارناسىنا سىلتەمە جاساپ.
«سق-فارماتسيانىڭ» بۇرىنعى باسشىسى بەرىك ءشارىپتىڭ ىسىنە قاتىستى سوت تەرگەۋىنە كۋاگەر رەتىندە تارتىلعان ول الماتىداعى ورتالىق كلينيكالىق اۋرۋحانادا ۆيرۋستىڭ تارالۋىنا قاتىستى تۇسىنىكتەمە بەردى.
بىلتىر ينفەكتسيانىڭ جاپپاي تارالۋىنا بىرنەشە جايت سەبەپ بولعان. قورعانىش كيىمىنىڭ جەتىسپەۋىنەن بولەك، ولاردى كيۋ ءتارتىبى بۇزىلعان، اۋرۋحاناداعى وقشاۋلاۋ جۇيەسىز جۇرگىزىلگەن. قابىلداناتىن ناۋقاستار اعىمى دا دۇرىس رەتتەلمەگەن.
ەسكە سالساق، «سق-فارماتسيا» كومپانياسىنىڭ بۇرىنعى باسشىسى بەرىك ءشارىپ لاۋازىمدىق وكىلەتتىگىن اسىرا پايدالانۋ بويىنشا سوتقا تارتىلعان ەدى. ياعني، كومپانيا قورعانىش كيىمىن ۋاقىتىلى جەتكىزبەگەندىكتەن، مەديتسينا قىزمەتكەرلەرى جاپپاي اۋرۋعا شالدىقتى دەگەن ايىپ تاعىلعان. بەرىك شارىپكە قارۋدى زاڭسىز يەمدەنۋ مەن ساقتاۋ بابى بويىنشا دا ايىپ تاعىلىپ وتىر.
