فاريزا، فاريزاجان...
بەكزات بولمىسىمەن، ءبۇتىن بىتىمىمەن ەلگە تانىلعان اكادەميك-جازۋشى زەينوللا قابدولوۆتىڭ زايىبى ساۋلە اپاي بىردە وتباسىلىق مۇراعاتىن اقتارىپ وتىرىپ، مىنا حاتتى تاۋىپ الىپتى. ارداقتى اعامىز وسىدان قىرىق ەكى جىلداي ۋاقىت بۇرىن ەكى جىلدىڭ توعىسىندا قازاقتىڭ تالانتتى اقىنى فاريزا وڭعارسىنوۆاعا مەيىرلى لەبىزىن ارناپتى.
زەكەڭ سول مەزگىلدە تۋعان اعاسىنان ايىرىلعان اقىن قارىنداسىنا جاڭا جىل قارساڭىندا جاقسى تىلەگىن ايتىپ، جىلى سوزبەن دەمەپتى.
جىر جۇيرىگى مۇقاعاليدىڭ ولەڭمەن ورگەن «فاريزا، فاريزاجان، فاريزا قىز..» دەگەن ايگىلى ءسوز تىركەسى اقىن قىزعا دەگەن ەلدىڭ شەكسىز ىقىلاسىن بىلدىرەتىن بەينەلى ۇعىمعا اينالدى. سول مۇقاعاليدىڭ ءوزى دە زەينوللا اعانى جانىنداي جاقسى كورىپ، «اعاتايىم، ارقا سۇيەرىم – زەكەم!»، – دەپ ەركەلەپ-ەمىرەنگەن.
عيبراتى مول وسى شاعىن جازبانى تاعى ءبىر جاڭا جىل باستالعان ساتتە تالانتتى تۇلعالاردىڭ جاراسىمدى سىيلاستىعىنىڭ مىسالى رەتىندە ۇسىنىپ وتىرمىز.
امانتاي ءشارىپ،
باۋىرجان ومارۇلى
قاراعىم فاريزا!
«كۇلكى-جاسى ارالاس،
اقىن دا ءبىر جاس بالا»، –
دەپ قاسىم ايتقانداي، مىنە، قايعى-قۋانىش ارالاس 79-جىلىڭ دا ءوتىپ بارادى; بۇل جىل – سەنىڭ وتباسىندا ەر-اعادان ايىرىلىپ، جالعىز مارالداي ماڭىراعان جىلىڭ عانا ەمەس، تۇزدە – ولەڭ ولكەسىندەگى ەل-انامەن جاڭا ساپادا تابىسىپ، جامىراعان دا جىلىڭ بولدى...
زادىندا، اقىن – پاراسات دۇنيەسىنىڭ اق پەرىشتەسى. مىنا كەلگەن 80-جىل سەنىڭ سول ادەمىلىك الەمىندەگى تۇنىق اسپانداي بيىك، تىمىق تەڭىزدەي تەرەڭ جىلىڭ بولعاي. پارلاي بەر دە، سامعاي بەر، اق قاناتتى اقىن قارىنداسىم، اسىلىم، اياۋلىم!
اعاڭ زەينوللا قابدولوۆ.
28.12.79.
