FARIZA, FARIZAJAN...
Bekzat bolmysymen, bútin bitimimen elge tanylǵan akademık-jazýshy Zeınolla Qabdolovtyń zaıyby Sáýle apaı birde otbasylyq muraǵatyn aqtaryp otyryp, myna hatty taýyp alypty. Ardaqty aǵamyz osydan qyryq eki jyldaı ýaqyt buryn eki jyldyń toǵysynda qazaqtyń talantty aqyny Farıza Ońǵarsynovaǵa meıirli lebizin arnapty.
Zekeń sol mezgilde týǵan aǵasynan aıyrylǵan aqyn qaryndasyna jańa jyl qarsańynda jaqsy tilegin aıtyp, jyly sózben demepti.
Jyr júırigi Muqaǵalıdyń óleńmen órgen «Farıza, Farızajan, Farıza qyz..» degen áıgili sóz tirkesi aqyn qyzǵa degen eldiń sheksiz yqylasyn bildiretin beıneli uǵymǵa aınaldy. Sol Muqaǵalıdyń ózi de Zeınolla aǵany janyndaı jaqsy kórip, «Aǵataıym, arqa súıerim – Zekem!», – dep erkelep-emirengen.
Ǵıbraty mol osy shaǵyn jazbany taǵy bir jańa jyl bastalǵan sátte talantty tulǵalardyń jarasymdy syılastyǵynyń mysaly retinde usynyp otyrmyz.
Amantaı ShÁRIP,
Baýyrjan OMARULY
Qaraǵym FARIZA!
«Kúlki-jasy aralas,
Aqyn da bir jas bala», –
dep Qasym aıtqandaı, mine, qaıǵy-qýanysh aralas 79-jylyń da ótip barady; Bul jyl – seniń otbasynda er-Aǵadan aıyrylyp, jalǵyz maraldaı mańyraǵan jylyń ǵana emes, túzde – óleń ólkesindegi el-Anamen jańa sapada tabysyp, jamyraǵan da jylyń boldy...
Zadynda, aqyn – parasat dúnıesiniń aq perishtesi. Myna kelgen 80-jyl seniń sol ádemilik álemindegi tunyq aspandaı bıik, tymyq teńizdeı tereń jylyń bolǵaı. Parlaı ber de, samǵaı ber, aq qanatty aqyn qaryndasym, asylym, aıaýlym!
Aǵań Zeınolla QABDOLOV.
28.12.79.
