عاني ەسكەرتكىشى تۋرالى

...1969 جىل، 23 وكتيابر. كومسومولدىڭ تۋعان كۇنىنە بايلانىستى ك. ي. سكريابين اتىنداعى ۆەتەريناريا اكادەمياسىنىڭ جوعارعى كۋرس ستۋدەنتتەرىنىڭ ۇيىمداستىرۋىمەن ۆاگانكوۆ قورىمىندا، عاني بەيىتىنىڭ باسىندا ميتينگى بولدى. وندا سويلەگەن جولداستار عاني مۇراتباەۆتىڭ ءومىرى تۋرالى، ونىڭ ورتا ازيا كومسومولدارىن ۇيىمداستىرۋداعى اتقارعان جۇمىستارى تۋرالى ايتتى. قابىر باسىندا گۇل شوقتارى، ۆەنوك قويىلدى. مينۋتتىك ۇنسىزدىكپەن عاني اعانى ەسكە ءتۇسىرىپ، بولاشاق ءومىر ءۇشىن قىرشىن ءومىرىن قيعان ناعىز لەنينشىل، جالىندى جۇرەك، سارقىلماس قايرات يەسى عاني ءومىرىن، ونىڭ ءىسىن ونان ءارى جالعاستىرىپ، وتان ءۇشىن، كوممۋنيزم ءۇشىن بارلىق ءبىلىمىمىز بەن كۇشىمىزدى ايامايمىز دەپ ىشتەي سەرت بەردىك.

مىنە، وسى ماسەلە بويىنشا مەن كراسنايا پرەسنيا اۋداندىق كومسومول كوميتەتىندە بولىپ كوپتەگەن جولداستارمەن سۇحباتتاسىپ، عاني بەيىتىنە قامقورلىق جاساۋدى سول قورىمعا جاقىن ورنالاسقان «موسگورسپەتسستروي» مەكەمەسىنىڭ كومسومول ۇيىمىنىڭ سەكرەتارى ۆلاديمير توكارەۆ جانە باسقا دا كومسومولەتستەر بۇل ماسەلەنى شەشۋگە قۇلشىنا كىرىستى. بىزدەر ءبىرىنشى رەت كەزدەسۋلەر جاساپ عاني اعا تۋرالى، ونىڭ جاساعان جۇمىستارى تۋرالى اڭگىمەلەپ بەردىك. سۋرەتتەر، كىتاپتار سىيعا تارتتىق. ەسكەرتكىش تۇرعىزۋ ءۇشىن بىرنەشە رەت سەنبىلىك، جەكسەنبىلىكتەر ۇيىمداستىرىلدى. مىنە، وسىنىڭ اراسىندا بىزدەر 1967 جىلى قازاق سسر مادەنيەت مينيسترلىگى ارقىلى ەسكەرتكىشكە زاكاز بەرىلگەندىگىن بىلدىك. جانە سول ەسكەرتكىشتىڭ تاياۋ ۋاقىتتا بىتەتىندىگىن ەستىپ، قازاقستان لكسم ورتالىق كوميتەتىنە، «لەنينشىل جاس» رەداكتسياسىنا، عاني مۇراتباەۆتىڭ جۇبايى، الماتىدا تۇراتىن باقىتجان مۇراتباەۆالارعا حابارلادىق.

مىنە، عانيدىڭ جەرلەنگەن جەرىن تاپقاننان كەيىن قازاقستاننىڭ تۇراقتى وكىلدىگىنىڭ قىزمەتكەرى جولداس سۇلەيمەنوۆتىڭ قاتىسۋىمەن عانيدىڭ بۇرىنعى 13 بولىمشەدەگى ارىستانوۆ، تۇرمانجانوۆ جولداستاردىڭ قاتە تاپقان بەيىتىن جويعان بولاتىنبىز. ول بەيىت ورىستىڭ پراۆوسلاۆنىي مەشىتىنىڭ قىزمەتكەرلەرىنىڭ اراسىندا بولاتىن. قالتامداعى سوڭعى تيىنعا ساتىپ العان گۇل شوقتارىن سول قاتە تابىلعان بەيىتكە قويىپ جۇرگەنىم ەسىمنەن كەتپەيدى.