اتىراۋ وبلىسىندا كاسپي تەڭىزىنىڭ جاعالاۋىندا قامىس ورتەنىپ جاتىر، دەپ حابارلايدى "ادىرنا" ۇلتتىق پورتالى.
قامىس ورتىنە 8 قازاننان بەرى تىكۇشاقپەن 61 توننا سۋ توگىلگەن.
اتىراۋ وبلىستىق توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسىنىڭ باستىعى، ازاماتتىق قورعاۋ پودپولكوۆنيگى باعدات ابدۋللين قامىس ءورتىن ءسوندىرۋ ءالى جالعاسىپ جاتقانىن حابارلاعان.
«كاسپي تەڭىزىنىڭ جاعالاۋىنداعى قامىس ءورتىنىڭ العاشقىسى 7 قازاندا انىقتالدى. ءورت قۇرمانعازى اۋدانىنداعى قۇرمانعازى اۋىلىنان 43 شاقىرىم، يساتاي اۋدانىنىڭ زينەدەن اۋىلىنان 56 شاقىرىم قاشىقتىقتاعى اۋماقتا انىقتالدى. ەكىنشى ءورت كەشە، 9 قازاندا «اقجايىق» مەملەكەتتىك تابيعي رەزەرۆات اۋماعىندا تۇتاندى. قازىر اڭشىلىق ماۋسىمى ءوتىپ جاتىر. قامىس ءورتىنىڭ تۇتانۋىنا اڭشىلاردىڭ دالادا وت جاعۋى مەن تەمەكى تۇقىلىن تاستاۋى سەبەپ بولۋى مۇمكىن. سوڭعى ەكى كۇندە تىكۇشاقپەن قامىس ورتىنە 31 توننا سۋ توگىلدى»، -دەپ حابارلادى باعدات ابدۋللين.
قامىس ءورتى ەكولوگياعا دا اسەر ەتكەن.
«مونيتورينگ كەزىندە كۇكىرتتى سۋتەك، كومىرتەك، ازوت ديوكسيدى سەكىلدى لاستاۋشى زاتتاردىڭ ينگريدەنتتەرى قامتىلدى. اۋاعا تاراعان زياندى زاتتاردىڭ شەكتى مولشەردەن اسۋ دەرەگى تىركەلدى»، -دەپ ءمالىم ەتتى وبلىستىق ەكولوگيا دەپارتامەنتى باسشىسىنىڭ مىندەتىن اتقارۋشى ەرلان ەسەنوۆ.
ەسكە سالا كەتەيىك، الەۋمەتتىك جەلىدە قاراعاندى وبلىسىنداعى قارقارالى اۋدانىندا دالا ورتىنەن جانۋارلاردىڭ قاشىپ جاتقانى تۇسىرىلگەن بەينە جاريالانعانى تۋرالى جازعان ەدىك.
