فوتو: قتج ءباسپاسوزى
«قازاقستان تەمىر جولى» ۇلتتىق كومپانياسى باسقارما توراعاسى مەن «سامۇرىق-قازىنا» قورى باسشىسىنىڭ ۇستالۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
كومپانيا قۇقىق قورعاۋ ورگاندارىنا قاجەتتى اقپارات پەن ماتەريالداردى ۇسىنىپ، تەرگەۋگە جان-جاقتى كومەك كورسەتىپ جاتقانىن ايتتى.
قتج ءباسپاسوز قىزمەتىنىڭ حابارلاۋىنشا، قازىرگى ۋاقىتتا كومپانيادا رەسمي جاريالانعان مالىمەتتەردەن باسقا قوسىمشا اقپارات جوق. قىلمىستىق-پروتسەستىك كودەكستىڭ 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى. وسىعان بايلانىستى ۇلتتىق كومپانيا ازىرگە قوسىمشا تۇسىنىكتەمە بەرە المايتىنىن جەتكىزدى.
سونداي-اق قتج مەن «قازاقستان تەمىر جولى» ۇك» اق توبىنا كىرەتىن ۇيىمدار قالىپتى جۇمىس تارتىبىندە قىزمەتىن جالعاستىرىپ جاتقانى ايتىلدى. كومپانيا ينۆەستورلار، كرەديتورلار، حالىقارالىق قارجى ۇيىمدارى جانە ىسكەرلىك سەرىكتەستەر الدىنداعى مىندەتتەمەلەردىڭ تولىق كولەمدە ساقتالاتىنىن مالىمدەدى.
12 قاراشادا ۇلتتىق قاۋىپسىزدىك كوميتەتى «سامۇرىق-قازىنا» اق باسقارما توراعاسى نۇرلان جاقىپوۆتىڭ، «قازاقستان تەمىر جولى» ۇك» اق باسشىسى ەلجاس وتىنشيەۆتىڭ جانە وزگە دە تۇلعالاردىڭ ۇستالعانىن رەسمي راستادى.
ۇقك مالىمەتىنشە، ولار سىبايلاس جەمقورلىق قىلمىستارىن جاسادى دەگەن كۇدىككە ىلىنگەن. قازىر ءىستىڭ ءمان-جايىن انىقتاۋعا باعىتتالعان تەرگەۋ امالدارى جۇرگىزىلىپ جاتىر.
وسى وقيعادان كەيىن الەۋمەتتىك جەلىلەردە استاناداعى قوناەۆ كوشەسىندە ورنالاسقان تۇرعىن ءۇي كەشەنىنىڭ ماڭىنان شاشىلعان دوللار بانكنوتتارى تۇسىرىلگەن ۆيدەو تارادى. جەلى قولدانۋشىلارى اقشانى باسشىلاردىڭ ۇستالۋىمەن بايلانىستىرۋى مۇمكىن دەگەن بولجام ايتتى. سونداي-اق ءتىنتۋ كەزىندە اقشا سالىنعان سومكەلەر مەن چەمودانداردىڭ پاتەر تەرەزەسىنەن لاقتىرىلعانى تۋرالى اقپارات تارادى. الايدا بۇل مالىمەتتەر مەن تابىلعان اقشانىڭ تەرگەۋگە قاتىسى ازىرگە رەسمي تۇردە راستالعان جوق.
