ماحامبەت دوسمۇحامبەتوۆ: اناعا قۇرمەت، قىز-كەلىنشەكتەرگە ىزەت ءار كۇنى جاسالادى

3015
Adyrna.kz Telegram

اتىراۋ وبلىسىنىڭ اكىمى ماحامبەت دوسمۇحامبەتوۆ 8-ناۋرىز  ايەلدەردىڭ حالىقارالىق كۇنىنە وراي ءوڭىردىڭ قىز-كەلىنشەكتەرىن قۇتتىقتادى.

«ءومىر سىزدەرمەن شۋاقتى» اتتى ءىس-شاراعا قوعام قايراتكەرلەرى، ارداگەر جانە  كوپ بالالى انالار مەن قالا، اۋدانداردان كەلگەن  ار سالادا قىزمەت ەتىپ جۇرگەن قىز-كەلىنشەكتەرى قاتىستى.

ايماق باسشىسى الدىمەن ايەل زاتىنىڭ ادامزات تاريحى مەن الەم وركەنيەتىندەگى ەرەكشە رولىنە توقتالدى. ۇلتتىق تاريحتا دا حالقىمىزدىڭ اناعا ىزەت، ايەلگە قۇرمەتتى ءار كۇنى جاسايتىنىن، ونىڭ عاسىرلار بويى كەلە جاتقان باستى قۇندىلىعىمىز ەكەنىن اتاپ ءوتتى.

«الەمدەگى جاقسىلىق، ىزگىلىك پەن قايىرىمدىلىق — انانىڭ اق ءسۇتى مەن اسىل ارمانىنىڭ جەمىسى ىسپەتتى. ال ەشكىمگە باس يمەگەن باتىر دا، ەشكىمدى بەت قاراتپاعان اقىن دا انانىڭ الدىندا باس يەدى. بۇل تەرەڭ تاريحىمىزدان كەلە جاتقان اق جاۋلىقتىلارعا دەگەن ايرىقشا قۇرمەت، ۇلاعاتتى ىزەت! ويتكەنى، قىزىن قۇرمەتتەپ تورگە وزدىرعان، جارىن الپەشتەپ، اناسىن ايالاعان ەلدىك سانامىز بار. سوندىقتان قىز-كەلىنشەكتەرىمىزدىڭ اراسىنان باتىر دا، اقىن دا، تۇتاس ەلگە تۇتقا بولعان دانالار دا شىققان»،- دەگەن ماحامبەت دوسمۇحامبەتوۆ ايەل قاۋىمىنىڭ تاۋەلسىزدىكتى نىعايتۋدا مەملەكەتىمىزدىڭ قوعامدىق-ساياسي، ەكونوميكالىق، الەۋمەتتىك-مادەني جالپى بارلىق سالانىڭ دامۋىنا زور ۇلەس قوسىپ كەلە جاتقانىن ايرىقشا اتادى. سونىمەن قاتار، ۇلت تاريحىندا، ءداستۇرلى وتباسى ينستيتۋتى مەن ۇرپاق تاربيەسىندەگى انالاردىڭ زور رولىنە ريزاشىلىعىن ءبىلدىردى.

 

«سىزدەر، ەلىمىزدىڭ بولاشاعى ءۇشىن ۇلى ميسسيا اتقارىپ وتىرسىزدار. قازىرگى قوعامدا تەك شاڭىراقتىڭ شاتتىعى عانا ەمەس، ەلدىك ىستەردىڭ باسى-قاسىندا دا جۇرسىزدەر. اتىراۋلىق قىز-كەلىنشەكتەر دە كاسىپكەرلىك پەن ساياسات، ءبىلىم مەن دەنساۋلىق، عىلىم مەن ونەردە ورەلى ىستەرىمەن كوزگە ءتۇسىپ، جەتىستىكتەرىمەن قۋانتۋدا. سوندىقتان سىزدەر ارقىلى بارشا انالارىمىزعا، اپا-قارىنداستارىمىزعا ەرەكشە العىسىمدى بىلدىرەم!»،-دەدى قۇتتىقتاۋ سوزىندە.

 


اقىن، قر ەڭبەك سىڭىرگەن قايراتكەرى اقۇشتاپ باقتىگەرەەۆا باستاپ، ەڭبەك ارداگەرى، دارىگەر، پوليتسيا، مۇعالىم، سونداي-اق ونەركاسىپ پەن ونەر سالاسى سونداي-اق قوعامدىق ۇيىم وكىلدەرى كەزەكپەن ءسوز الىپ، بارلىق انالار مەن قىز-كەلىنشەكتەرگە ىستىق لەبىزدەرىن  جەتكىزدى.  

 

 


مەملەكەتتىك قىزمەت ىستەرى سالاسىنىڭ ارداگەرى، اتىراۋ وبلىسىنىڭ قۇرمەتتى ازاماتى راشيليا مۇرساليەۆا پاندەميالىق قيىندىقتارعا قاراماستان ەڭ باستىسى وڭىردە اۋقىمدى جۇمىستار جاسالىپ جاتقانىنا توقتالدى.
«الىمەن ەلدەگى قيىندىقتارعا قاراماستان ەلىمىز دە، ءوڭىرىمىز دە دامۋ جولىن جالعاستىرىپ كەلەدى. كۇردەلى كەزەڭدە انالارىمىز بەن قىز-كەلىنشەكتەرىمىز   ەرەن ەڭبەك ەتتى. مەملەكەتىمىز پاندەميادان تولىق ارىلىپ، الداعى ۋاقىتتا ءوڭىرىمىزدىڭ وركەندەۋى جالعاسسىن. بارلىق انالارىمىزدىڭ تىلەگى وسى!»،- دەدى ول.
سونداي-اق، ءىس-شارادا ايەل قاۋىمى اسەم ءان شىرقاپ، قىز-كەلىنشەكتەرگە ەستەلىك سىيلىقتار مەن گۇل شوقتارى تابىستالدى.

"ادىرنا" ۇلتتىق پورتالى

پىكىرلەر