فوتو: Shutterstock
ۆەنگريا بيلىگى سىبايلاس جەمقورلىققا قاتىستى تەرگەۋ بارىسىندا جاسىرىن ورىنداردان 20 ميلليون دوللارعا جۋىق قولما-قول اقشا تاپتى، دەپ حابارلايدى "ادىرنا" ۇلتتىق پورتالى AFP اگەنتتىگىنە سىلتەپ.
قاراجات ورمان ىشىنەن، قويمالاردان، تۇرعىن ۇيلەردەن جانە اۋىل شارۋاشىلىعى نىساندارىنان انىقتالعان.
ۆەنگريانىڭ اكتيۆتەردى قايتارۋ جانە قورعاۋ جونىندەگى ۇلتتىق باسقارماسىنىڭ مالىمەتىنشە، ءتىنتۋ جۇمىستارى ەكى كۇن بويى بۋداپەشت قالاسى مەن ەلدىڭ ءۇش وڭىرىندە جۇرگىزىلگەن. تەرگەۋشىلەر اقشانىڭ ءبىر بولىگىن ورمانعا كومىپ، قالعانىن قويمالار مەن تۇرعىن ۇيلەرگە جاسىرعانىن انىقتادى. سونداي-اق وقشاۋ جەردە ورنالاسقان قىمبات سەيفتەن دە ءىرى كولەمدە قاراجات تابىلعان.
تاركىلەنگەن اقشانىڭ ىشىندە 5,07 ميلليارد ۆەنگر ءفورينتى (شامامەن 13,3 ميلليون ەۋرو), 2,66 ميلليون ەۋرو جانە 1,26 ميلليون اقش دوللارى بار. ۆەنگريانىڭ قارجى ءمينيسترى اندراش كارماننىڭ ايتۋىنشا، مەملەكەتتىك قازىناشىلىقتىڭ 12 قىزمەتكەرى بەس اقشا ساناۋ قۇرىلعىسىن پايدالانىپ، بانكنوتتاردى سەگىز ساعات بويى ساناعان.
قازىر تاركىلەنگەن قاراجات مەملەكەتتىك قازىناشىلىقتىڭ ەسەپشوتىنا اۋدارىلعان.
تەرگەۋ ەلدىڭ بۇرىنعى ۇلتتىق دامۋ ءمينيسترى ميكلوش شەشتاكقا قاتىستى جۇرگىزىلىپ جاتىر. ول 2014–2018 جىلدارى ۆيكتور وربان ۇكىمەتىندە قىزمەت اتقارعان. بۇرىنعى مينيستر 37 ميلليون دوللاردان استام پارا مەن زاڭسىز كوميسسيا الدى دەگەن كۇدىككە ىلىنگەن. تەرگەۋ نۇسقاسى بويىنشا، قاراجات مەملەكەتتىك كولىك كومپانيالارىنىڭ پايدالانىلعان اۆتوبۋستاردى قىمبات باعاعا ساتىپ الۋىنا جانە مەملەكەتتىك قۇرىلىس جوبالارىنا بايلانىستى بولۋى مۇمكىن.
شەشتاك قىركۇيەك ايىنىڭ سوڭىندا ۇستالعان. الايدا ول وزىنە تاعىلعان ايىپتاردى مويىندامايدى. بۇرىنعى ءمينيستردىڭ ادۆوكاتى گابور پاپپ جۋرناليستەردىڭ تابىلعان اقشاعا قاتىستى ساۋالىنا ازىرگە جاۋاپ بەرمەگەن.
ۆەنگريا پرەمەر-ءمينيسترى پەتەر ماديار بۇل وقيعانى ۆيكتور وربان بيلىگى تۇسىنداعى ىقتيمال سىبايلاس جەمقورلىقپەن كۇرەستەگى ماڭىزدى بەتبۇرىس دەپ باعالادى. ول Facebook پاراقشاسىندا اقشانىڭ تابىلۋىن «فيدەس – حريستيان-دەموكراتيالىق حالىق پارتياسى مافياسىنىڭ رەسمي اياقتالۋى» دەپ اتاعان.
