Atyraý oblysynda Kaspıı teńiziniń jaǵalaýynda qamys órtenip jatyr, dep habarlaıdy "Adyrna" ulttyq portaly.
Qamys órtine 8 qazannan beri tikushaqpen 61 tonna sý tógilgen.
Atyraý oblystyq tótenshe jaǵdaılar departamenti memlekettik órt baqylaý basqarmasynyń bastyǵy, azamattyq qorǵaý podpolkovnıgi Baǵdat Abdýllın qamys órtin sóndirý áli jalǵasyp jatqanyn habarlaǵan.
«Kaspıı teńiziniń jaǵalaýyndaǵy qamys órtiniń alǵashqysy 7 qazanda anyqtaldy. Órt Qurmanǵazy aýdanyndaǵy Qurmanǵazy aýylynan 43 shaqyrym, Isataı aýdanynyń Zıneden aýylynan 56 shaqyrym qashyqtyqtaǵy aýmaqta anyqtaldy. Ekinshi órt keshe, 9 qazanda «Aqjaıyq» memlekettik tabıǵı rezervat aýmaǵynda tutandy. Qazir ańshylyq maýsymy ótip jatyr. Qamys órtiniń tutanýyna ańshylardyń dalada ot jaǵýy men temeki tuqylyn tastaýy sebep bolýy múmkin. Sońǵy eki kúnde tikushaqpen qamys órtine 31 tonna sý tógildi», -dep habarlady Baǵdat Abdýllın.
Qamys órti ekologııaǵa da áser etken.
«Monıtorıng kezinde kúkirtti sýtek, kómirtek, azot dıoksıdi sekildi lastaýshy zattardyń ıngrıdentteri qamtyldy. Aýaǵa taraǵan zııandy zattardyń shekti mólsherden asý deregi tirkeldi», -dep málim etti oblystyq ekologııa departamenti basshysynyń mindetin atqarýshy Erlan Esenov.
Eske sala keteıik, áleýmettik jelide Qaraǵandy oblysyndaǵy Qarqaraly aýdanynda dala órtinen janýarlardyń qashyp jatqany túsirilgen beıne jarııalanǵany týraly jazǵan edik.
