قازاقستان پرەزيدەنتى قاسىم-جومارت توقاەۆ پەن ءانشى ديماش قۇدايبەرگەن الەمدەگى ەڭ ىقپالدى 500 مۇسىلماننىڭ جىل سايىنعى تىزىمىنە ەندى، دەپ حابارلايدى “ادىرنا” ءتىلشىسى ۇلىسمەدياعا سىلتەپ.
ولار 2027 جىلعى The Muslim 500 رەيتينگىندە قازاقستان اتىنان ۇسىنىلعان.
رەيتينگتى يوردانيا استاناسى اممان قالاسىندا ورنالاسقان كورولدىك يسلام ستراتەگيالىق زەرتتەۋلەر ورتالىعى جاريالادى.
پرەزيدەنت قاسىم-جومارت توقاەۆ «ساياسات» ساناتىنا ەنگىزىلسە، ديماش قۇدايبەرگەن «ونەر جانە مادەنيەت» باعىتى بويىنشا تىزىمگە ەنگەن. رەيتينگكە ساياساتكەرلەرمەن قاتار ءدىن قايراتكەرلەرى، عالىمدار، كاسىپكەرلەر، سپورتشىلار مەن مادەنيەت وكىلدەرى دە كىرەدى.
بيىل ءتىزىمنىڭ ءبىرىنشى ورنىن بەس تۇلعا ءبولىستى. ولاردىڭ قاتارىندا ساۋد ارابياسىنىڭ كورولى سالمان يبن ءابدۋلازيز، تاق مۇراگەرى مۇحاممەد يبن سالمان، پاكىستان پرەمەر-ءمينيسترى شاحباز شاريف، فەلدمارشال اسيم مۋنير جانە تۇركيا پرەزيدەنتى رەجەپ تايىپ ەردوعان دا بار.
ورتالىق ازيا ەلدەرى باسشىلارىنىڭ اراسىندا ەڭ جوعارى كورسەتكىشكە وزبەكستان پرەزيدەنتى شاۆكات ميرزيوەۆ قول جەتكىزدى. ول رەيتينگتە 40-ورىنعا جايعاسىپ، العاش رەت ۇزدىك 50-لىككە ەندى.
The Muslim 500 رەيتينگى 2009 جىلدان بەرى جاريالانىپ كەلەدى. ونى قۇراستىرۋشىلار تۇلعالاردى مۇسىلمان قوعامىنا، قوعامدىق ۇدەرىستەرگە، ساياسات پەن مادەنيەتكە ىقپال ەتۋ دەڭگەيىنە قاراي باعالايدى. جالپى ءتىزىم 13 باعىتتى قامتيدى.
