اتىراۋدا تۇرعىن ۇيلەر مەن زيراتتاردى توناپ كەلگەن 4 ادام ۇستالدى. بۇل تۋرالى وبلىستىق پوليتسيا دەپارتامەنتى ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
دەپارتامەنت مالىمەتىنشە، كۇدىكتىلەردىڭ جاسى 29-33 جاس ارالىعىندا.
«اتىراۋ قالالىق №2 پوليتسيا ءبولىمىنىڭ قىزمەتكەرلەرى جەدەل-ىزدەستىرۋ ءىس-شاراسى كەزىندە شاھار اۋماعىنداعى تۇرعىن ۇيلەرگە، وعان قوسا زيراتتارعا ۇرلىققا تۇسكەن 1989, 1992, 1992 جانە 1993 جىلى تۋعان ءتورت كۇدىكتىنى انىقتاپ، ۇستادى. كۇدىكتىلەر اقپان-مامىر ايلارى ارالىعىندا الدىن الا ءسوز بايلاسۋ ارقىلى اتىراۋ قالاسى اۋماعىنداعى زيراتتاردان مەتالل ايشىقتار مەن قۇلپىتاستاردى قولدى ەتىپ، مارقۇمداردىڭ تۋىستارىنا 3 ملن 570 مىڭ تەڭگەگە ماتەريالدىق شىعىن كەلتىرگەن.ۇرلىقتى كاسىپ ەتكەندەر بۇل قىلمىستىق ءىس-ارەكەتتەرىمەن شەكتەلمەي، اتىراۋ قالاسىنىڭ شاعىناۋداندارىنداعى 6 تۇرعىن ءۇي-جايعا زاڭسىز كىرۋ ارقىلى ءارتۇرلى وندىرىستىك تەحنيكالاردى، التىن بۇيىمداردى، ويىن پريستاۆكاسىن، قۇرىلىس قۇرالدارىن جاسىرىن جىمقىرعان. ءسويتىپ، تۇرعىن ءۇي يەلەرىن 6 ملن تەڭگەگە شىعىنعا باتىرعان»، - دەلىنگەن حابارلامادا.
ءتورت كۇدىكتىگە قاتىستى قر قىلمىستىق كودەكسىنىڭ 188-بابى 3-بولىگىنىڭ 1,2,3) تارماقتارى بويىنشا سوتقا دەيىنگى تەرگەپ-تەكسەرۋ جۇرگىزىلدى. قىلمىستىق ءىس زاڭدى شەشىم شىعارۋ ءۇشىن سوتقا جولداندى.
”ادىرنا” ۇلتتىق پورتالى