جەلىدە قازاقستاندى ۆەلوسيپەدپەن ارالايمىن دەگەن قازاقستاندىقتىڭ بەينە بلوگتارى تارادى. ول وندا قالا مەن اۋىل، دالا مەن ايماقتارعا جول تۇزەپ، ساياحاتىنىڭ قىزىقتى ساتتەرىن جاريالاۋدا. ەلىمىزدىڭ تۇكپىر-تۇكپىرىنە قوس دوڭگەلەكتى تۇلپارمەن ۆەلوساياحات جاساپ، شاقىرىمداردى شارشاماي ەڭسەرگەن قازاقستاندىق مۇرات قاراباي ءحوببيى جايلى «ادىرنا» تىلشىسىنە اڭگىمەلەپ بەردى.
اۋەسقويلىقتان - الەمگە
مۇرات قاراباي – الماتى قالاسىنىڭ تۋماسى. شوقان ءۋاليحانوۆ اتىنداعى №12 ورتا مەكتەپتى تامامداعان. بالا كەزىندە اسكەري ادام بولۋدى ارمان ەتكەن ول، قازىر بۇل سالادان الىس ەكەنىن جەتكىزدى. ۆەلوساياحاتتى جانىنا مەدەۋ ەتكەن مۇرات مىرزا تەمىر اتىن العاشىندا جاي قىدىرىس ءۇشىن العانىن ايتتى.
«مەن وزىمە 2013 جىلى ءبىر ۆەلوسيپەد ساتىپ العانمىن. وندا دا جاي عانا دۇكەنگە نەمەسە پاركتە قىدىرۋ ءۇشىن العان ەدىم. كەيىن ۇيدەن جۇمىسقا قاراي بارۋعا ايداپ شىعا باستادىم. بىرتە-بىرتە 2018 جىلدان باستاپ مەدەۋ جاققا كوتەرىلدىم. ءبىرىنشى ساپارىم 3 ساعاتتىڭ توڭىرەگىنە دەيىن سوزىلدى. ءبىر جىلدان كەيىن، 2019 جىلى ەسەنتاي مەن ءال-فارابي قيىلىسىنان مەدەۋگە دەيىن اۋەسقوي جارىسقا دايىندالىپ، كادىمگىدەي جاتتىعا باستادىم. سول جارىستا مەدەۋگە 1 ساعات 35 مينۋتتا شىعىپ، 118 قاتىسۋشىنىڭ ىشىنەن 59-ورىن الدىم. سودان كەيىن ۇنەمى اۋەسقوي جارىستارعا دايىندالىپ، قاتىسىپ ءجۇرمىن” دەدى ول.
«ءوزىم جانە ەركىندىك»
مۇرات قاراباي ۆەلوسيپەد تەبۋىن كارانتيننىڭ كەزىندە يممۋنيتەتىن جاقسارتۋ ءۇشىن دە توقتاتپاعانىن ايتتى. ءتىپتى ول جۇرت پاندەميامەن كۇرەسىپ جۇرگەن ۋاقىتتا باسقا كولىك تۇرلەرىن قولدانباعانىن قوسا كەتتى:
«2020-جىلدان باستاپ ۆەلوسيپەدتى ءجيى تەۋىپ، ءتىپتى كارانتيننىڭ كەزىندە مۇلدەم تۇسپەيتىن بولدىم. ويتكەنى ۆيرۋستارعا ۇرىنباي ءجۇرۋ ءۇشىن مەنىڭ يممۋنيتەتىمنىڭ مىقتىلىعى اسا ماڭىزدى بولدى. اۋىرىپ جاتقان اناشىما قاراپ ءجۇردىم. اۋرۋ جۇقتىرماس ءۇشىن باسقا كولىك تۇرلەرىنەن دە باس تارتتىم. كوبىندە حالىق كوپ. ال ۆەلوسيپەدتە ءوزىم جانە ەركىندىك» دەدى ول.
وڭتۇستىككە ساپار
ۆەلوساياحاتشى وسى جولى وڭتۇستىك ايماقتارعا ساياحاتىن باستاعان. الماتىدان تۇركىستان، شىمكەنت قالالارىنا ساپارلاپ ونداعى العان اسەرلەرىمەن، كەزىككەن قيىندىقتارمەن دە بولىسە كەتتى.
«وسى جورىقتا ماعان قاتتى ۇناعان جامبىل وبلىسىنداعى مەركە، تۇركىستان وبلىسىنداعى تۇرار رىسقۇلوۆ اۋىلدارى. سونداي-اق، تۇركىستاننىڭ كوركەيۋىنە، دامىپ جاتقانىنا تاڭعالدىم. قالا سونداي ادەمى بولىپ كەتىپتى. بۇرىڭعى ساپارلاردان اسى-بارتوعاي اتتى جايلاۋىنا ساياحاتىم كەرەمەت اسەر قالدىرعان ەدى. وڭتۇستىك ايماقتارعا شەككەن ساپارىمدا ەڭ قيىنى - قاراما-قارسى سوققان جەل بولدى. الماتىدان شىققالى بەرى تۋرا الدىمنان سوعىپ، جىلدامدىعىمدى تومەندەتۋىمە تۋرا كەلدى. بىراق وعان قاراماستان جۇرە بەردىم. وڭتۇستىك وڭىردەگى جولدا كەزدەستىرگەن ادامداردىڭ كوبى كوڭىلدەرى اشىق، جاندارى جايساڭ ەكەندىگىن بايقادىم. كەيبىرەۋلەرى ءشايدىڭ اقشاسىن الماي، ەندى بىرەۋلەرى قىمىزبەن قاربىزدى اياعان جوق. ءوزىمدى ۇيالتىپ جىبەردى» دەپ كۇلدى ول.
«سالاۋاتتى ءومىر سۇرەيىك»
ايتار اۋىزعا جەڭىل كورىنگەنمەن ۆەلوسيپەد تەبۋ، ونىمەن ساياحات قۇرۋ، بىرنەشە شاقىرىم شابۋ ۇلكەن تاجىريبە مەن ءتوزىمدى قاجەت ەتەدى. دەسە دە، دەنساۋلىققا بەرەر پايداسى دا مول.
«ۆەلوسيپەدپەن تۇراقتى سەرۋەن قۇرۋ جۇرەك پەن قان تامىرلارىن نىعايتادى جانە شىنىقتىرا تۇسەدى. دەنەنى سەرگەك ەتەدى، جۇمىستان شارشاۋدى ازايتادى. ۇيقىڭ دا قانىق بولادى جانە ۇنەمى ەنەرگياعا تولى جۇرەسىڭ. ۆەلوسيپەدپەن ءجۇرۋ كەزىندە ادەتتەگىدەن كوبىرەك اۋا جۇتاسىڭ، ياعني وكپە تولىق قۋاتتا جۇمىس ىستەيدى، ولاردىڭ كولەمى ارتقان سايىن مەتابوليزم قالىپتى جاعدايعا ورالادى. ەگەر تەحنيكاسىن دۇرىس قولدانىپ، تىزە مەن جۇرەككە اۋىر اسەر ەتپەيتىندەي ايداسا، قوس دوڭگەلەكتىڭ ۇستىندە كوپكە دەيىن شابۋعا بولادى. بىراق ۇزاق جولعا شىعۋ ءۇشىن كۇندەلىكتى دايىندىق كەرەك. سالاۋاتتى ءومىر سالتىن ۇستانىپ جۇرسە عانا ادامدار سپورتتا ۇلكەن ناتيجەلەرگە جەتە الادى” دەپ اتاپ ءوتتى ۆەلوساياحاتشى مۇرات.
دينا ليتپين
«ادىرنا» ۇلتتىق پورتالى
