شىعىس قازاقستاندا ماروككودان كەلگەن جولاۋشىنىڭ ۆەلوسيپەدى بۇزىلعان، دەپ حابارلايدى "ادىرنا" ۇلتتىق پورتالى.
جولدا قيىن جاعدايعا تاپ بولعان شەتەلدىك ۆەلوساياحاتشىعا پوليتسەيلەر كومەك كورسەتتى.
ماروككو ازاماتى اديل بۋمليك ۆەلوسيپەدپەن وسكەمەن قالاسى ارقىلى سامار اۋدانى باعىتىنا ساپار شەگىپ بارا جاتقان. الايدا ۋمىش اسۋى ماڭىندا ونىڭ ۆەلوسيپەدى بۇزىلىپ، ءارى قاراي وزدىگىنەن قوزعالۋ مۇمكىن بولماي قالعان.
قيىن جاعدايدا قالعان تۋريستكە پوليتسيا قىزمەتكەرلەرى كومەككە كەلگەن. ولار شەتەلدىك ازاماتتىڭ قاۋىپسىزدىگىن قامتاماسىز ەتىپ قانا قويماي، ۆەلوسيپەدىن جوندەۋگە دە قول ۇشىن سوزعان.
كەلەسى كۇنى اديل بۋمليك ساپارىن قايتا جالعاستىردى. قازىرگى تاڭدا ول قاتونقاراعاي اۋدانى مەن التاي اۋدانى باعىتىنا جول تارتىپ، قازاقستاندا شامامەن ءبىر اي ۋاقىت وتكىزۋدى جوسپارلاپ وتىر.
