فوتو: بايان شايعوزوۆانىڭ Facebook-تەگى پاراقشاسىنان
قازاقستاندىق ساياحاتشى سارسەنباي قوتىراشەۆ فرانتسيا استاناسى – پاريج قالاسىنا جاياۋ جەتىپ، ءوزىنىڭ كوپكۇندىك ساپارىنىڭ كەزەكتى كەزەڭىن ءساتتى اياقتادى. ول 24 ءساۋىر كۇنى تريۋمف اركاسى ماڭىندا مارەگە جەتىپ، وتانداستارى مەن ديپلوماتتاردىڭ قۇرمەتىنە بولەندى.
76 جاستاعى جيھانكەز 3 ناۋرىزدا جولعا شىعىپ، شامامەن 3000 شاقىرىمدى جاياۋ ەڭسەرگەن. ونىڭ باعىتى سەربيا، ماجارستان، اۆستريا جانە گەرمانيا ارقىلى ءوتىپ، فرانتسيا اۋماعىندا اياقتالدى. ساپار بارىسىندا ءتۇرلى لوگيستيكالىق جانە تابيعي قيىندىقتارعا قاراماستان، ساياحاتشى ءوز ماقساتىنا جەتتى.
قوتىراشەۆ بۇعان دەيىن دە اۋقىمدى جاياۋ ساپارلارىمەن تانىلعان. ول قازاقستان اۋماعىن تولىق ارالاپ، كاۆكاز ارقىلى تۇركيا ەلىنە جەتكەن. كەيىن التاي مەن موڭعوليا ارقىلى قىتاي جەرىنە دەيىن بارعان. الەۋمەتتىك جەلىلەردە ول UlytauMan لاقاپ اتىمەن بەلگىلى.
ەۋروپاداعى باعىت ساياحاتشى ءۇشىن ەڭ كۇردەلى كەزەڭدەردىڭ ءبىرى بولدى. جول قوزعالىسى تالاپتارىنا بايلانىستى ول اۆتوباندارمەن جۇرە الماي، كوبىنە ۆەلوسيپەد جولدارى مەن بالاما باعىتتاردى پايدالانۋعا ءماجبۇر بولعان. سونىمەن قاتار، جۇك ارتقان ارباسىنىڭ ىستەن شىققان ساتتەرى دە تىركەلگەن.
پاريجدەگى ساپارى اياسىندا ساياحاتشى يۋنەسكو شتاب-پاتەرىنە بارىپ، حالىقارالىق دەڭگەيدە قۇرمەتكە يە بولدى. ۇيىم وكىلدەرى ونى قازاق مادەنيەتىن ناسيحاتتاۋشى تۇلعا رەتىندە باعالادى.
"مەن الەمگە قازاق حالقىنىڭ قايسار، رۋحى بيىك حالىق ەكەنىن كورسەتكىم كەلەدى. ءبىزدىڭ اتا-بابالارىمىز مەتالدى يگەرگەن، عىلىممەن اينالىسقان، جىلقىنى قولعا ۇيرەتكەن. مەن وسىنى ءوز جولىممەن دالەلدەۋدى ماقسات ەتتىم", - دەيدى سارسەنباي قوتىراشەۆ.
قازىرگى تاڭدا سارسەنباي قوتىراشەۆتىڭ ءجۇرىپ وتكەن جالپى قاشىقتىعى شامامەن 18 مىڭ شاقىرىمعا جەتكەن. ونىڭ باستى ماقساتى — 75 جاستان اسقان ساياحاتشى رەتىندە 40 مىڭ شاقىرىمنان استام جول ءجۇرىپ، گيننەستىڭ رەكوردتار كىتابى تىزىمىنە ەنۋ.
الداعى جوسپارلارىنا سايكەس، ساياحاتشى 2027 جىلى اقش اۋماعىن اتلانت مۇحيتىنان تىنىق مۇحيتىنا دەيىن جاياۋ كەسىپ ءوتۋدى كوزدەپ وتىر. سونىمەن قاتار، ەلگە ورالعان سوڭ ۇستالىق ونەرىن جالعاستىرىپ، جاڭا ساپارلارعا دايىندالماق.
