فوتو جي-مەن جاسالعان
قازاقستاندا ءۇشىنشى اتوم ەلەكتر ستانتسياسىن سالۋ ءۇشىن شىعىس قازاقستان، باتىس قازاقستان جانە سولتۇستىك قازاقستان وڭىرلەرىندەگى بىرنەشە الەۋەتتى الاڭ زەرتتەلىپ جاتىر، دەپ حابارلايدى “ادىرنا”.
بۇل تۋرالى اتوم ەنەرگياسى جونىندەگى اگەنتتىك توراعاسى الماسادام ساتقاليەۆ ايتتى.
ونىڭ سوزىنشە، ەلىمىزدە كەمىندە ءۇش اتوم ەلەكتر ستانتسياسىن سالۋ جوسپاردا بار. العاشقى ەكى ستانتسيانى الماتى وبلىسىنىڭ جامبىل اۋدانىندا ورنالاستىرۋ كوزدەلگەن. گەولوگيالىق، گيدرولوگيالىق جانە باسقا دا زەرتتەۋلەردىڭ الدىن الا قورىتىندىسى بويىنشا، بۇل اۋماق قولايلى دەپ تانىلعان.
ال ءۇشىنشى اەس-ءتىڭ ىقتيمال ورنالاسۋ ورىندارىنىڭ قاتارىندا شىعىس قازاقستان وبلىسىنداعى كۋرچاتوۆ قالاسى، كاسپي تەڭىزىنىڭ جاعالاۋى جانە سولتۇستىك قازاقستانداعى اۋماقتار بار.
«شىعىس قازاقستانداعى كۋرچاتوۆ قالاسىن، باتىس قازاقستانداعى كاسپي تەڭىزىنىڭ جاعالاۋىن زەرتتەپ جاتىرمىز. سونداي-اق KEGOC جۇيەلىك وپەراتورىنىڭ ۇسىنىسى بويىنشا سولتۇستىك قازاقستانداعى الاڭدى قاراستىرامىز. اڭگىمە توبىل وزەنى بويىنداعى، سالقىنداتۋعا قاجەتتى سۋ قورى جەتكىلىكتى اۋماق تۋرالى بولىپ وتىر»، – دەدى الماسادام ساتقاليەۆ.
اگەنتتىك توراعاسىنىڭ سوزىنشە، بولاشاق ستانتسيانىڭ ورنىن انىقتاۋ كەزىندە ەلەكتر ەنەرگياسىن تۇتىنۋ كولەمىنىڭ ءوسۋى جانە ورتاشا قۋاتتى رەاكتورلاردى پايدالانۋ مۇمكىندىگى ەسكەرىلەدى. مۇنداي رەاكتورلار ەلەكتر ەنەرگياسىمەن قاتار جىلۋ وندىرۋگە، ال كەيبىر جاعدايدا سۋدى تۇششى ەتۋگە دە مۇمكىندىك بەرەدى.
ءۇشىنشى اەس سالۋعا ۇسىنىلعان بارلىق اۋماق اتوم ەنەرگەتيكاسىن دامىتۋدىڭ كەلەسى كەزەڭدەرىندە جان-جاقتى زەرتتەلەدى.
