فوتو: Reuters
رەسەي ۋكرايناداعى سوعىستى توقتاتۋ جونىندەگى كەلىسسوزدەردە باتىس ەلدەرىنەن ناتو ەلدەرىنىڭ ورتالىق ازياداعى كەز كەلگەن اسكەري قىزمەتتەن باس تارتۋىن تالاپ ەتكەن. بۇل تۋرالى The New York Times باسىلىمى 13 قاراشادا جاريالاعان ماتەريالىندا جازدى، دەپ حابارلايدى “ادىرنا”.
باسىلىمنىڭ مالىمەتىنشە، رەسەي وكىلدەرى ابۋ-دابيدە اقش جانە ۋكراينا دەلەگاتسيالارىمەن وتكەن كەلىسسوزدەردە ءوز تالاپتارى كورسەتىلگەن بەيرەسمي قۇجات تاراتقان. ماسكەۋ ناتو-نىڭ ۋكراينادا، شىعىس ەۋروپانىڭ وزگە مەملەكەتتەرىندە، وڭتۇستىك كاۆكازدا جانە ورتالىق ازيادا اسكەري قىزمەت جۇرگىزۋىنە شەكتەۋ قويۋدى كوزدەيدى. سونىمەن قاتار اليانستىڭ ودان ءارى كەڭەيۋىنە قارسى تالاپ قويعان.
رەسەيدىڭ بۇل ۇستانىمى 2021 جىلى جاريالانعان ۇسىنىستارىمەن دە سايكەس كەلەدى. سول كەزدەگى كەلىسىم جوباسىندا ناتو مەملەكەتتەرىنە ۋكراينادا، شىعىس ەۋروپادا، زاكاۆكازەدە جانە ورتالىق ازيادا كەز كەلگەن اسكەري قىزمەتتەن باس تارتۋ ۇسىنىلعان بولاتىن.
بۇدان بولەك، ماسكەۋ ناتو اسكەرلەرى مەن اسكەري بازالارىن 1997 جىلعى ورنالاسۋ شەكارالارىنا قايتارۋدى جانە باتىس ەلدەرىنىڭ ۋكرايناعا قارۋ-جاراق جەتكىزۋىن توقتاتۋدى تالاپ ەتىپ وتىر. سونداي-اق ۋكراينانىڭ ەۋروپالىق وداقتىڭ ورتاق قورعانىس ساياساتىنا قاتىسپاعان جاعدايدا عانا ۇيىمعا قوسىلۋىنا كەلىسىم بەرۋگە دايىن ەكەنىن بىلدىرگەن. ۇلىبريتانيا مەن فرانتسيانىڭ يادرولىق قارۋىن ەۋروپانىڭ باسقا مەملەكەتتەرىن قورعاۋ ءۇشىن پايدالانۋ مۇمكىندىگىن دە شەكتەۋدى كوزدەيدى.
The New York Times دەرەككوزدەرىنىڭ حابارلاۋىنشا، رەسەي وكىلدەرى بۇل تالاپتاردىڭ كەلىسسوزدەردەگى باستاپقى ۇستانىم ەكەنىن جانە ۆلاديمير ءپۋتيننىڭ بەلگىلى ءبىر ماسەلەلەر بويىنشا يكەمدىلىك تانىتۋى مۇمكىن ەكەنىن ايتقان.
ال اقش وكىلدەرى ستيۆ ۋيتكوفف پەن دجارەد كۋشنەر رەسەي تاراپىنىڭ ۇسىنىستارىنا قاتىستى 2021 جىلدان بەرى حالىقارالىق جاعدايدىڭ وزگەرگەنىن اتاپ وتكەن. ولار ماسكەۋ شيەلەنىستى تومەندەتۋگە باعىتتالعان ناقتى قادامدار ۇسىنعان جاعدايدا، جاڭا تالاپتاردى قاراستىرۋعا دايىن ەكەنىن جەتكىزگەن.
ايتا كەتەيىك، رەسەي تاراتقان قۇجات 10 قاراشادا ازىرلەنگەن. وندا رەسمي قول مەن مەملەكەتتىك بلانك جوق. باسىلىمنىڭ جازۋىنشا، بۇل قۇجات كەلىسىلگەن جوسپار ەمەس، ماسكەۋدىڭ كەلىسسوزدەردەگى ۇستانىمىن بىلدىرەتىن بەيرەسمي ماتەريال.
