سۋرەت جي-مەن جاسالعان
Nvidia كومپانياسىنىڭ باس ديرەكتورى قىزمەتىنە دجەنسەن حۋانگتى قايتارۋدى تالاپ ەتكەن پەتيتسياعا 150 مىڭعا جۋىق ادام قول قويعان. ولاردىڭ قاتارىندا ميللياردەر يلون ماسك پەن Replit باعدارلامالىق جاساقتاما ازىرلەۋ پلاتفورماسىنىڭ باسشىسى امدجاد ماساد بار. بۇل تۋرالى Business Insider باسىلىمى جازدى، دەپ حابارلايدى «ادىرنا» ءتىلشىسى.
ەكەۋى دە پەتيتسيانى X الەۋمەتتىك جەلىسىندە قولداپ، كوپشىلىككە تاراتۋعا اتسالىسقان.
ناۋقاننىڭ رەسمي سايتىنداعى مالىمەتكە سايكەس، پەتيتسياعا 58 مىڭنان استام اكتسيونەر، Nvidia كومپانياسىنىڭ قازىرگى 5,6 مىڭنان استام قىزمەتكەرى جانە بۇرىنعى 1 مىڭعا جۋىق قىزمەتكەر قول قويعان. قول قويۋشىلار اراسىندا Boom Supersonic اەروعارىش كومپانياسىنىڭ باسشىسى بلەيك شولل مەن Y Combinator ۆەنچۋرلىق كومپانياسىنىڭ جەتەكشىسى گەرري تان دا بار.
سونىمەن قاتار ۇيىمداستىرۋشىلار قول جيناۋشىلار تىزىمىندە جالعان قولتاڭبالاردىڭ بار ەكەنىن مويىنداپ، ولاردى جويۋ جۇمىستارىن جۇرگىزىپ جاتقانىن مالىمدەگەن.
وسى اپتادا Nvidia ديرەكتورلار كەڭەسى حۋانگتىڭ «شەتەلدىك ارنايى قىزمەتتەردىڭ نىساناسىنا اينالعان-اينالماعانىن» تەكسەرەتىنىن حابارلاعان. بۇعان كومپانيا باسشىسىنىڭ قىزمەتكەرلەرگە جازعان حاتىندا نەكەدەن تىس قارىم-قاتىناسى بولعانىن مويىنداۋى سەبەپ بولعان.
كەيىن ونىڭ كومپانيانىڭ جوعارى لاۋازىمدى مەنەدجەرلەرىنىڭ بىرىمەن تاعى ءبىر بايلانىسى بولعانى تۋرالى اقپارات تاراعان سوڭ، حۋانگ قىزمەتىنەن كەتتى. ال باس ديرەكتوردىڭ مىندەتىن ۋاقىتشا اتقارۋشى بولىپ كومپانيانىڭ اتقارۋشى ۆيتسە-پرەزيدەنتى ءارى قارجى ديرەكتورى كولەتت كرەسس تاعايىندالدى.
