Nvidia كومپانياسىنىڭ بۇرىنعى باسشىسى دجەنسەن حۋانگ ءوزىنىڭ مۇراگەرىن تاڭداۋعا جەكە ءوزى قاتىسىپ، ىقتيمال ۇمىتكەرلەردىڭ كەمىندە بىرىنە قوڭىراۋ شالعان. بۇل تۋرالى The Washington Post باسىلىمى جازدى، دەپ حابارلايدى «ادىرنا» ءتىلشىسى.
دەرەككوزدەردىڭ مالىمەتىنشە، حۋانگ كومپانيانىڭ بۇكىل باسقارۋ جۇيەسىن ءوزىنىڭ توڭىرەگىنە شوعىرلاندىرعان. ونىڭ تىكەلەي قاراماعىندا 60-قا جۋىق قىزمەتكەر بولعان. سونىمەن قاتار ديرەكتورلار كەڭەسىن دە ءوزى باسقارعاندىقتان، ونىڭ شەشىمدەرىنە قارسى پىكىر بىلدىرەتىن ادام بولماعان. ال ۇلى مەن قىزى كومپانيادا باسشىلىق قىزمەتتەر اتقارادى.
«بۇل – سوڭعى 10–20 جىلداعى باس ديرەكتور لاۋازىمىنا ارنالعان ەڭ كۇردەلى ۆاكانسيالاردىڭ ءبىرى»، – دەدى گارۆارد بيزنەس مەكتەبىنىڭ پروفەسسورى ەندي ۆۋ.
ونىڭ ايتۋىنشا، Nvidia بيزنەسىن باسقارۋ ءۇشىن ينجەنەرلىك ءبىلىم قاجەت. ال ەلەكتروتەحنيكا سالاسىندا دوكتورلىق دارەجەسى بار ءارى باسقارۋشىلىق قابىلەتى جوعارى مامانداردى قاتار تابۋ وڭاي ەمەس. حۋانگتىڭ ءوزى بۇعان دەيىن ونىڭ ورنىن باسۋ مۇمكىن ەمەسكە جاقىن ەكەنىن ايتىپ، مۇنى ءوزىنىڭ «وسى كومپانيادا ءوسىپ-جەتىلۋىمەن» تۇسىندىرگەن.
Bernstein Research ساراپشىلارى Nvidia اكتسيالارىنىڭ بولجامدى باعاسىن ەكى ەسەگە – 400 دوللاردان 200 دوللارعا دەيىن تومەندەتكەن. بۇعان جاڭا باس ديرەكتوردىڭ بۇرىنعى جەتەكشىنىڭ دەڭگەيىنە جەتە الاتىنىنا قاتىستى كۇمان سەبەپ بولعان.
WP دەرەككوزدەرىنىڭ حابارلاۋىنشا، Nvidia ازىرگە مۇراگەردى ىزدەۋ ءۇشىن ارنايى رەكرۋتينگتىك اگەنتتىك تاڭداماعان.
ء«بىز الەۋەتتى ۇمىتكەرلەردىڭ ەشقايسىسىمەن رەسمي كەلىسسوز جۇرگىزگەن جوقپىز»، – دەدى ديرەكتورلار كەڭەسى.
ال Financial Times باسىلىمىنىڭ جازۋىنشا، حۋانگتىڭ ىقتيمال مۇراگەرىن ىزدەۋ اياسىندا ديرەكتورلار كەڭەسى بريتاندىق Arm چيپ ازىرلەۋشى كومپانياسىنىڭ باسشىسى رەنە حااسپەن بايلانىسقا شىققان.
بۇعان دەيىن NVIDIA كومپانياسىنىڭ باس ديرەكتورى دجەنسەن حۋانگتىڭ قىزمەتىنەن كەتكەنىن جازعان ەدىك.
