تۋريزم جانە سپورت ءمينيسترىنىڭ ورىنباسارى سەرىك جاراسباەۆ كورنەكتى جيھانكەز، تۋريزم سالاسىنىڭ ۇزدىگى سارسەنباي قوتىراشوۆقا «قۇرمەتتى سپورت قىزمەتكەرى» اتاعىن تابىستادى، دەپ حابارلايدى «ادىرنا» ءتىلشىسى.
تاجىريبەلى ساياحاتشى 2022 جىلى 72 جاسىندا قازاقستاننىڭ 17 وبلىسىن جاياۋ ارالاپ، 8 مىڭ شاقىرىم جولدى ءجۇرىپ وتكەن ەدى. وسى جەتىستىگى ءۇشىن وتاندىق كينەس رەكوردتار كىتابىنا ەنگەن.
كەيىنگى جىلدارى دا ول حالىقارالىق دەڭگەيدەگى جاياۋ ساياحاتتارىن جالعاستىرىپ كەلەدى. 2023 جىلى اتىراۋدان جولعا شىعىپ، كاۆكاز ءوڭىرى مەن گرۋزيا ارقىلى تۇركيانىڭ ستامبۋل قالاسىنا جەتكەن. ال 2024 جىلى وسكەمەننەن باستاپ التاي، موڭعوليا ارقىلى قىتاي استاناسى بەيجىڭگە دەيىن بارعان.
بيىل 3 ناۋرىزدا باستالعان كەزەكتى ساپارى اياسىندا 76 جاستاعى جيھانكەز سەربيا، ماجارستان، اۋستريا، گەرمانيا جانە فرانتسيا ەلدەرىن جاياۋ ءجۇرىپ ءوتىپ، جۋىردا عانا ەلگە ورالدى.
«ماراپات يەسىنىڭ ءومىر جولى مەن تاباندىلىعى – وتاندىق ءتۋريزمدى دامىتۋعا جانە سالاۋاتتى ءومىر سالتىن ناسيحاتتاۋعا ۇلگى»،– دەلىنگەن مينيسترلىك حابارلاماسىندا.
