Jelide Qazaqstandy velosıpedpen aralaımyn degen qazaqstandyqtyń beıne blogtary tarady. Ol onda qala men aýyl, dala men aımaqtarǵa jol túzep, saıahatynyń qyzyqty sátterin jarııalaýda. Elimizdiń túkpir-túkpirine qos dóńgelekti tulparmen velosaıahat jasap, shaqyrymdardy sharshamaı eńsergen qazaqstandyq Murat Qarabaı hobbıi jaıly «Adyrna» tilshisine áńgimelep berdi.
ÁÝESQOILYQTAN - ÁLEMGE
Murat Qarabaı – Almaty qalasynyń týmasy. Shoqan Ýálıhanov atyndaǵy №12 orta mektepti támamdaǵan. Bala kezinde áskerı adam bolýdy arman etken ol, qazir bul saladan alys ekenin jetkizdi. Velosaıahatty janyna medeý etken Murat myrza temir atyn alǵashynda jaı qydyrys úshin alǵanyn aıtty.
«Men ózime 2013 jyly bir velosıped satyp alǵanmyn. Onda da jaı ǵana dúkenge nemese parkte qydyrý úshin alǵan edim. Keıin úıden jumysqa qaraı barýǵa aıdap shyǵa bastadym. Birte-birte 2018 jyldan bastap Medeý jaqqa kóterildim. Birinshi saparym 3 saǵattyń tóńiregine deıin sozyldy. Bir jyldan keıin, 2019 jyly Esentaı men ál-Farabı qıylysynan Medeýge deıin áýesqoı jarysqa daıyndalyp, kádimgideı jattyǵa bastadym. Sol jarysta medeýge 1 saǵat 35 mınýtta shyǵyp, 118 qatysýshynyń ishinen 59-oryn aldym. Sodan keıin únemi áýesqoı jarystarǵa daıyndalyp, qatysyp júrmin” dedi ol.
«ÓZIM JÁNE ERKINDIK»
Murat Qarabaı velosıped tebýin karantınniń kezinde ımmýnıtetin jaqsartý úshin de toqtatpaǵanyn aıtty. Tipti ol jurt pandemııamen kúresip júrgen ýaqytta basqa kólik túrlerin qoldanbaǵanyn qosa ketti:
«2020-jyldan bastap velosıpedti jıi teýip, tipti karantınniń kezinde múldem túspeıtin boldym. Óıtkeni vırýstarǵa urynbaı júrý úshin meniń ımmýnıtetimniń myqtylyǵy asa mańyzdy boldy. Aýyryp jatqan anashyma qarap júrdim. Aýrý juqtyrmas úshin basqa kólik túrlerinen de bas tarttym. Kóbinde halyq kóp. Al velosıpedte ózim jáne erkindik» dedi ol.
OŃTÚSTIKKE SAPAR
Velosaıahatshy osy joly Ońtústik aımaqtarǵa saıahatyn bastaǵan. Almatydan Túrkistan, Shymkent qalalaryna saparlap ondaǵy alǵan áserlerimen, kezikken qıyndyqtarmen de bólise ketti.
«Osy joryqta maǵan qatty unaǵan Jambyl oblysyndaǵy Merke, Túrkistan oblysyndaǵy Turar Rysqulov aýyldary. Sondaı-aq, Túrkistannyń kórkeıýine, damyp jatqanyna tańǵaldym. Qala sondaı ádemi bolyp ketipti. Buryńǵy saparlardan Asy-Bartoǵaı atty jaılaýyna saıahatym keremet áser qaldyrǵan edi. Ońtústik aımaqtarǵa shekken saparymda eń qıyny - qarama-qarsy soqqan jel boldy. Almatydan shyqqaly beri týra aldymnan soǵyp, jyldamdyǵymdy tómendetýime týra keldi. Biraq oǵan qaramastan júre berdim. Ońtústik óńirdegi jolda kezdestirgen adamdardyń kóbi kóńilderi ashyq, jandary jaısań ekendigin baıqadym. Keıbireýleri shaıdiń aqshasyn almaı, endi bireýleri qymyzben qarbyzdy aıaǵan joq. Ózimdi uıaltyp jiberdi» dep kúldi ol.
«SALAÝATTY ÓMIR SÚREIIK»
Aıtar aýyzǵa jeńil kóringenmen velosıped tebý, onymen saıahat qurý, birneshe shaqyrym shabý úlken tájirıbe men tózimdi qajet etedi. Dese de, densaýlyqqa berer paıdasy da mol.
«Velosıpedpen turaqty serýen qurý júrek pen qan tamyrlaryn nyǵaıtady jáne shynyqtyra túsedi. Deneni sergek etedi, jumystan sharshaýdy azaıtady. Uıqyń da qanyq bolady jáne únemi energııaǵa toly júresiń. Velosıpedpen júrý kezinde ádettegiden kóbirek aýa jutasyń, ıaǵnı ókpe tolyq qýatta jumys isteıdi, olardyń kólemi artqan saıyn metabolızm qalypty jaǵdaıǵa oralady. Eger tehnıkasyn durys qoldanyp, tize men júrekke aýyr áser etpeıtindeı aıdasa, qos dóńgelektiń ústinde kópke deıin shabýǵa bolady. Biraq uzaq jolǵa shyǵý úshin kúndelikti daıyndyq kerek. Salaýatty ómir saltyn ustanyp júrse ǵana adamdar sportta úlken nátıjelerge jete alady” dep atap ótti velosaıahatshy Murat.
Dına Lıtpın
«Adyrna» ulttyq portaly
