30 قاڭتار كۇنى "ازاتتىق" راديوسى استانانىڭ مامانداندىرىلعان اۋدانارالىق اكىمشىلىك سوتىنا باسىلىم جۋرناليستەرىنە اككرەديتاتسيا بەرۋدەن جانە ۇزارتۋدان باس تارتقانى ءۇشىن قازاقستان ءسىم-نە شەشىم كۇشىن جويۋدى تالاپ ەتىپ، ارىز بەردى، دەپ حابارلايدى "ادىرنا" ۇلتتىق پورتالى "ازاتتىق" سايتىنا سىلتەپ.
ارىزدا وكىلدىك ازاتتىق تىلشىلەرىنە اككرەديتاتسيا بەرمەگەن نەمەسە اككرەديتاتسيا مەرزىمىن ۇزارتپاعان قازاقستان ءسىم-ءنىڭ شەشىمىن زاڭسىز دەپ تانىپ، كۇشىن جويۋدى سۇراعان.
مينيسترلىككە قارسى شاعىم 2024 جىلدىڭ 3 قاڭتارىندا ازات ەۋروپا/ازاتتىق راديوسىنا قازاقستان سىرتقى ىستەر مينيسترلىگىنەن "وكىلدىكتىڭ 36 قىزمەتكەرىن اككرەديتتەۋدەن نەمەسە اككرەديتاتسيا مەرزىمىن ۇزارتۋدان باس تارتۋ تۋرالى شەشىم قابىلدانعانى جونىندە" حات كەلگەننەن كەيىن ءتۇسىرىلىپ وتىر.
ۆەدومستۆو جاۋابىندا جۋرناليستەردىڭ "اككرەديتاتسياسىز جۇمىس ىستەپ كەلگەنى", سونىمەن بىرگە رەداكتسياعا ايىپپۇل سالىنعانىن (قۇقىق قورعاۋشىلار "جالعان اقپارات تۋرالى" جاڭا باپتى رەسەيلىك "فەيكتەر تۋرالى" زاڭعا ۇقساتقان) العا تارتقان.
شاعىمدا ازات ەۋروپا/ازاتتىق راديوسى - قازاقستان وكىلدىگى (RFE/RL-قازاقستان) سوتتان ۆەدومستۆو كەلتىرگەن دالەل-دايەكتەردى نەگىزسىز دەپ تانۋدى سۇراعان، سەبەبى رەداكتسيانىڭ ايتۋىنشا، ولار جۋرناليستەردىڭ اككرەديتاتسياسىنا قاتىستى وتىنىشتەردى ۋاقىتىندا بەرىپ وتىرعان، وتىنىشتەر قارالۋى ءتيىس كەزدە جۋرناليستەردە اككرەديتاتسيا مەرزىمى اياقتالماعان، ال مينيسترلىك وتىنىشتەردى جاۋاپسىز قالدىرعان. اقپاراتقا قاراعاندا، قىزمەتكەرلەردى اككرەديتاتسيادان وتكىزۋ تۋرالى وتىنىشتەر وكىلدىكتى اكىمشىلىك جاۋاپقا تارتۋ تۋرالى شەشىم شىققانعا دەيىن كوپ ۋاقىت بۇرىن بەرىلگەن، بىراق ولار "دەر كەزىندە قارالماعان".
