جۋرناليست، قر ءماجىلىسىنىڭ دەپۋتاتى ەرمۇرات ءباپي قازاقستان رەسپۋبليكاسىنىڭ ۇكىمەتىنە، ۇلتتىق بانك توراعاسىنىڭ اتىنا اشىق حات جولدادى. اشىق حاتتا ەلىمىزدەگى 9 بانكتىڭ جابىلۋ ماسەلەسىن كوتەرىپ، "قۇپيا تۇردە ءجۇرىپ جاتقان قۇيتىرقىلىقتاردى" سىنعا الدى. "جۋسان بانك" ارقىلى حالىق قاراجاتىنىڭ قولدى بولىپ وتىرعانىن جەتكىزدى، دەپ حابارلايدى "ادىرنا" ۇلتتىق پورتالى.
دەپۋتات ەرمۇرات ءباپي حالىق قارجىسىنىڭ قالاي "قانالىپ وتىرعانىن" باياندادى:
- ەلدە توعىز بانك جابىلادى دەگەن اقپارات تارادى. ارينە بۇل حاباردىڭ تۇپنۇسقاسى ۇكىمەت پەن ۇلتتىق بانكتەن شىققانى داۋسىز. ءبىر جاعىنان ەلدەگى كودەدەي كوپ بانكىلەردى قىسقارتقان دا دۇرىس شىعار... ەكىنشى جاعىنان، ەگەر «9 بانكتى جابۋ» تۋرالى بۇل جاڭالىقتىڭ «جانى» بولسا، ونىڭ ەل ەكونوميكاسى ءۇشىن مۇمكىن بولار زاردابى مەن حالىقتىق قازىنانىڭ ەسەپكە الىنباعان شىعىنى تۋراسىندا پارلامەنت ءماجىلىسىنىڭ دەپۋتاتتارىن اقپاراتتاندىرۋ قاجەت بولادى...
بىراق ينسايدەرلىك اقپارات كوزدەرى ارقىلى ماعان ءبىراز ءجايت بەلگىلى بولدى. ونىڭ ۇستىنە، «جۋسان بانككە» قاتىستى تاريح تارقاپ بىتكەن جوق. قالاي دەسەك تە، زاڭسىز تولەنگەن جۇزدەگەن ميلليون دوللار ديۆيدەندتەر ەلگە قايتارىلۋى ءتيىس، - دەدى ول.
توقاەۆ ۇكىمەتىن نازارباەۆتاردىڭ ءتۇرلى جولدارمەن بوپسالاپ وتىرعانىن جازدى:
- مەنىڭ ويىمشا، «جۋسان بانكىنىڭ» توڭىرەگىندەگى بارلىق جۇمباق جاعدايلار جانە 9 بانكىنىڭ كەنەتتەن جابىلۋى «كىتاپحانانىڭ» بۇرىنعى لاس تاريحىن جاسىرۋ ارەكەتى مەن بولاشاققا ميلليونداعان دوللار قور جيناقتاپ الۋدىڭ امالىنان باسقا ەشتەڭە ەمەس. پرەزيدەنت توقاەۆتىڭ اكىمشىلىگىن حالىقارالىق اربيتراجدىق سوتتار ارقىلى «قورقىتۋ» – انىعىنا كەلگەندە، نازارباەۆ قورى مەن ۇلتتىق قوردىڭ ناقتى توناۋشىلارىن جاسىرىپ قالۋدىڭ ايلا-ارەكەتى. بۇل – بوس اۋرەشىلىك!
دەپۋتات قىرۋار قارجىنىڭ جالعان شەتەلدىك پسەۆدو-ينۆەستورلاردىڭ ەسەپ-شوتتارى ارقىلى نازارباەۆ اۋەتىنە اۋدارىلعانىن ايتتى:
- سەبەبى – بۇل ميلليوندار جالعان شەتەلدىك پسەۆدو-ينۆەستورلاردىڭ ەسەپ-شوتتارى ارقىلى نازارباەۆتىڭ ناقتى وتباسى مۇشەلەرى مەن قولاستىنداعى جاقىبايلاردىڭ ەسەپ-شوتتارىنا اۋدارىلعان ("جۋسان بانكتى" قولدانۋ ارقىلى). بۇل ەكس-پرەزيدەنتتىڭ قىزدارى مەن كۇيەۋبالالارىنا، جيەندەرى مەن نەمەرەلەرىنە جۇمىستان شىعۋ تولەماقىسى (ۆىحودنوە پوسوبيە) سياقتى بولدى دا شىقتى. ەڭ باستىسى – وسى سحەمانىڭ بارلىعىن ويلاپ تاۋىپ، جۇزەگە اسىرعان كارىم ءماسىموۆ ءۇشىن بۇل «كنب»-نىڭ تەرگەۋ اباقتىسىنان تولەنگەن اقى بولدى.
كەيىننەن بۇل جاعدايعا قاتىستى ماندىتىپ جاۋاپ بەرمەي وتىرعان ۇكىمەتتى سىنادى:
- بۇعان دەيىن سىزدەر دەپۋتاتتارعا سىرعىتپا جاۋاپ بەرۋمەن قۇتىلىپ كەلدىڭىزدەر. بۇدان بىلاي ولاي بولمايدى، ماسەلەن، مەن سىزدەردەن كەلگەن ءاربىر جاۋاپ، ەگەر ول سىرعىتپا جانە جالتارما بولسا، ونى جالپاق جۇرتقا جاريا ەتىپ وتىراتىن بولام، - دەپ جازدى اۆتور.
Cونىمەن قاتار دەپۋتات قازاقستان بايلىعىنىڭ نەگىزسىز شەتكە ساتىلىپ كەتىپ جاتقانىن دا سىنادى:
- ماسەلەن، حالىقتىڭ كوزىن الا بەرە، ۇكىمەت ەلدىڭ ەڭ ءبىر قۇندى اكتيۆى – ستەپنوگور تاۋ-حيميا كومبيناتىمەن بىرگە وراسان زور ۋران كەنىشىنىڭ قولدى بولۋىنا مۇمكىندىك بەردى. بۇل اكتيۆتىڭ قۇنى بىرنەشە ميلليارد دوللار ەدى. رەسەيلىك «روساتوم» ونى نەبارى ءبىرجارىم ميللياردقا الدى.
وسى ساۋدا-ساتتىقتان قازاقستان نەمەسە، تىم قۇرىعاندا، «قازاتومپروم» قانشا ۇلەس الا الدى؟ ءنول! قازاقتىڭ ۋران بايلىعىنان ونى وندىرگەن كومبينات تەسىك تيىن المادى! بۇل اكتيۆ بۇگىندە الەكساندر كلەبانوۆ پەن ونىڭ ۇلىن، داريعا نازارباەۆانى جانە ونىڭ كۇيەۋىن، بالالارى مەن كۇيەۋبالالارىن، ۆاسيلي انيسيموۆ دەگەن الدەبىر حورۆاتيا ازاماتىن بايىتىپ جاتىر، - دەدى دەپۋتات.
اشىق حات سوڭىندا دەپۋتات ۇندەۋ تاستاپ، حالىقتىڭ نەسىبەسى جايىن ءسوز ەتتى:
- قۇرمەتتى ۇكىمەت مۇشەلەرى، مينيسترلەر، مەملەكەتتىك اگەنتتىكتەر مەن ۇلتتىق كورپوراتسيالاردىڭ باسشىلارى، وليگارحتار مەن اكىمشىلىكتىڭ شەنەۋنىكتەرى!
سىزدەردىڭ كەسىرلەرىڭىزدەن ستەپنوگور كومبيناتى مەن قولدى بولعان الەمدەگى ەڭ باي ۋران كەنىشىنەن قازاق حالقى كوك تيىن پايدا كورمەدى! «جۋسان» جالماعان جانە باسقا بانكىلەرگە سىزدەر جۇتتىرعان بىرنەشە ميلليارد دوللاردان قازاق حالقىنا ەشتەڭە بۇيىرمادى.
ءبىز بۇنى اياقسىز قالدىرمايمىز! - دەدى دەپۋتات.
"ادىرنا" ۇلتتىق پورتالى
