ءماجىلىس دەپۋتاتى ەرمۇرات باپي قازاقستانداعى ءىرى بانكتەردىڭ اكتسيونەرلەرىنە سالىناتىن سالىقتى قايتا قاراۋدى ۇسىندى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ورتالىق ازياداعى ەڭ ءىرى قارجى ۇيىمدارى قازاقستاندا شوعىرلانعان، ال ولاردىڭ جالپى اكتيۆتەر كولەمى 55 ترلن تەڭگەگە جەتكەن. بۇل سوما ەلدىڭ ەكى جىلدىق بيۋدجەتىنەن دە اسىپ تۇسەدى.
"وسى بانكتەر ءوز قوجايىندارىنا، اكتسيونەرلەرىنە جىل سايىن ميللياردتاعان تەڭگە ديۆيدەنت تولەيدى. ءىرى اكتسيونەرلەر 100 ميلليون تەڭگەدەن استام ديۆيدەنت الادى، بىراق بۇل تابىسقا سالىق سالىنبايدى. سىزدەر، بالكىم، “ەكى رەت سالىق سالۋعا بولمايدى” دەرسىزدەر. الايدا ءبىزدىڭ ەلدىڭ بيۋدجەتى نەگىزىنەن الەۋمەتتىك سالاعا باعىتتالعان. ونىڭ 53 پايىزى الەۋمەتتىك شىعىندارعا كەتەدى، ال دامۋ ماقساتىنداعى شىعىندار 20 پايىزدان اسپايدى. سوندىقتان بانكتەردىڭ قوعام الدىنداعى جاۋاپكەرشىلىگىن ارتتىرۋ ءۇشىن ديۆيدەنتتەرگە سالىق سالۋ قاجەت دەپ سانايمىن", – دەدى دەپۋتات ءماجىلىس وتىرىسىندا.
ەرمۇرات باپي ءوزىنىڭ ۇسىنىسىندا ديۆيدەنت كولەمىنە قاراي سالىق مولشەرىن سارالاۋدى ۇسىندى. مىسالى، 100 ملن تەڭگەگە دەيىن ديۆيدەنت الاتىن اكتسيونەرلەرگە – 10 پايىز، 1 ملرد تەڭگەگە دەيىن الاتىندارعا – 15 پايىز كولەمىندە سالىق سالۋ قاجەت ەكەنىن ايتتى.
