الماتىدا قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ شىعارماشىلىق زيالى قاۋىم وكىلدەرىمەن جانە جاستارمەن كەزدەستى.
جيىندا مەملەكەت باسشىسى جولداۋىنىڭ نەگىزگى باعىتتارى، ۇلتتىق مادەنيەتتى دامىتۋ، ادەبيەتتى قولداۋ جانە زەردەلى ۇلت قالىپتاستىرۋ ماسەلەلەرى تالقىلاندى.
كەزدەسۋگە مادەنيەت جانە ونەر قايراتكەرلەرى، جاس قالامگەرلەر مەن كرەاتيۆتى يندۋستريا وكىلدەرى قاتىستى.
جولداۋدا ايقىندالعان مىندەتتەر جانە تسيفرلاندىرۋ مۇمكىندىكتەرى
مينيستر مەملەكەت باسشىسىنىڭ جولداۋىندا ايقىندالعان مىندەتتەرگە توقتالىپ، ولاردى ىسكە اسىرۋدا تسيفرلاندىرۋدىڭ جانە جاستاردىڭ بەلسەندى قاتىسۋىنىڭ ماڭىزىن اتاپ ءوتتى.
«مەملەكەت باسشىسىنىڭ جولداۋى – ەلىمىزدىڭ الداعى دامۋ باعىتىن ايقىندايتىن ماڭىزدى ستراتەگيالىق قۇجات. پرەزيدەنت جولداۋىنداعى يدەيالاردى جۇزەگە اسىرۋ مادەنيەت سالاسى مەن كرەاتيۆتى يندۋستريا وكىلدەرىنىڭ ەڭبەگىنە، ولاردىڭ ارقايسىسىنىڭ وسى جۇمىستاعى ءوز ءرولىن تۇسىنۋىنە تىكەلەي بايلانىستى. تسيفرلاندىرۋ مەن جاساندى ينتەللەكت شىعارماشىلىققا تىڭ مۇمكىندىكتەر اشىپ، مادەني مۇرانى كوپشىلىككە قولجەتىمدى ەتە تۇسەدى. ءبىزدىڭ باستى ماقساتىمىز – شىعارماشىلىق باستامالارعا جول اشۋ، ونەر مەن ادەبيەتتى حالىققا جاقىنداتۋ جانە جاس ۇرپاقتىڭ جاسامپاز قۋاتىن ەل دامۋىنا باعىتتاۋ»، – دەدى مينيستر.
زەردەلى ۇلت قالىپتاستىرۋ
مەملەكەت باسشىسىنىڭ زەردەلى ۇلت قالىپتاستىرۋ جونىندەگى باستاماسىن ىسكە اسىرۋعا ەرەكشە نازار اۋدارىلدى. reading-nation.kz پلاتفورماسىندا 1,4 ميلليوننان استام قاتىسۋشى تىركەلگەن. ولار 842 مىڭنان استام كىتاپ وقىپ، 50 مىڭنان استام بەينەپىكىر جاريالاعان.
قوعامدىق قۇندىلىقتار جانە ينفراقۇرىلىمدى دامىتۋ
قاتىسۋشىلار مەملەكەت باسشىسىنىڭ 2027 جىلدى جالپىحالىقتىق اۋقىمدى قۇرىلىس جىلى دەپ جاريالاۋ جونىندەگى باستاماسىن دا تالقىلادى. سونداي-اق الەۋمەتتىك جانە مادەني ينفراقۇرىلىمدى جاڭعىرتۋ، جاستارعا ارنالعان زاماناۋي كەڭىستىكتەر قۇرۋ ماسەلەلەرى ءسوز بولدى.
ۇلتتىق قۇندىلىقتاردى ساقتاۋ مەن قوعامدىق ادەپتى نىعايتۋ ماسەلەسىنە توقتالعان مينيستر «ادال ازامات»، «زاڭ مەن ءتارتىپ» جانە «تازا قازاقستان» قاعيداتتارىنىڭ ماڭىزىن اتاپ ءوتتى. سونداي-اق ۇلتتىق بىرەگەيلىكتى نىعايتۋدا، تاريحي مۇرا مەن قازىرگى قازاقستاننىڭ جاسامپازدىق الەۋەتىن ادەبيەت پەن ونەردە بەينەلەۋدە شىعارماشىل زيالى قاۋىمنىڭ ءرولى زور ەكەنىن ايتتى.
كەزدەسۋ اشىق پىكىر الماسۋعا ۇلاستى. قاتىسۋشىلار مينيسترگە سۇراقتارىن قويىپ، ءوز باستامالارىن ۇسىندى جانە مادەنيەت پەن ادەبيەتتىڭ الداعى دامۋ باعىتتارىن تالقىلادى.
ۇلتتىق كىتاپحانا ءتۇن ورتاسىنا دەيىن جۇمىس ىستەيدى
كەزدەسۋ بارىسىندا ارمان قىرىقباەۆ قازاقستان رەسپۋبليكاسىنىڭ ۇلتتىق كىتاپحاناسىنىڭ قىزمەتىمەن جانە وقىرمان بەلسەندىلىگى جونىندەگى دەرەكتەرمەن دە تانىستى.
2026 جىلدىڭ مامىر-قاراشا ايلارىندا كىتاپحاناعا 26 مىڭنان استام جاڭا وقىرمان تىركەلگەن. بۇل وتكەن جىلدىڭ سايكەس كەزەڭىمەن سالىستىرعاندا 73,8 پايىزعا كوپ. 15-35 جاس ارالىعىنداعى وقىرماندار سانى 33 پايىزعا ءوسىپ، 24 مىڭنان اسقان. وسى كەزەڭدە وقىرماندارعا 1,6 ميلليوننان استام قۇجات بەرىلگەن. ال ونلاين قىزمەتتەردى پايدالانۋشىلار سانى 13 پايىزعا ارتىپ، 932 مىڭنان استى.
وقىرمان بەلسەندىلىگىنىڭ ارتۋى مەن كەلۋشىلەردىڭ وتىنىشتەرىن ەسكەرگەن مينيستر ۇلتتىق كىتاپحانانىڭ جۇمىس ۋاقىتىن ساعات 24:00-گە دەيىن ۇزارتۋ تۋرالى شەشىم قابىلدانعانىن حابارلادى. جاڭا جۇمىس كەستەسى ستۋدەنتتەرگە، جۇمىس ىستەيتىن ازاماتتارعا جانە وزگە دە كەلۋشىلەرگە كەشكى ۋاقىتتا دا كىتاپحانا قورىن جانە قىزمەتتەرىن پايدالانۋعا مۇمكىندىك بەرەدى.
