مەملەكەت باسشىسىنىڭ جارلىعىمەن پرەمەر-ءمينيستردىڭ جاڭا ورىنباسارى تاعايىندالدى، دەپ حابارلايدى "ادىرنا" ءتىلشىسى اقورداعا سىلتەپ.
اتالعان جارلىق بويىنشا قانات بوزىمباەۆ جاڭا قىزمەتكە تاعايىندالدى. ول بۇرىن ەنەرگەتيكا ءمينيسترى، الماتى، پاۆلودار، جامبىل وبلىستارىنىڭ اكىمى بولعان. سوڭعى اتقارعان قىزمەتى - پرەزيدەنت كەڭەسشىسى بولاتىن.
جاڭا تاعايىنداۋ تۋرالى اقوردانىڭ رەسمي سايتىندا جاريالانعان.
الايدا جاڭا تاعايىنداۋدان سوڭ "چەمودان گوسسەكرەتوۆ" تەلەگرام-ارناسىندا بوزىمباەۆ پەن سكليارعا قاتىستى اقپارات تارادى.
"سكلياردىڭ ورنىنا بوزىمباەۆ تاعايىندالدى دەگەن اقپارات تاراپ جاتىر. بۇل جالعان. بوزىمباەۆ پرەمەر-ءمينيستردىڭ جاڭا ورىنباسارى قىزمەتىنە كىرىسىپ، بەكتەنوۆتىڭ ءبىرىنشى ورىنباسارى (رومان سكلياردىڭ) فۋنكتسياسىنداعى جۇكتەمەنى ءىشىنارا جەڭىلدەتەدى", - دەلىنگەن.
ەسكە سالا كەتەيىك، پرەمەر-ءمينيستردىڭ ءبىرىنشى ورىنباسارى قىزمەتىندەگى رومان سكلياردىڭ قىزمەتىنە قاتىستى ەشقانداي رەسمي مالىمدەمە جاريالانعان جوق. الايدا كەشە وتكەن جيىن بارىسىندا پرەزيدەنت سۋ تاسقىنىنا قارسى ۋاقىتىلى شارا قابىلداماعانى ءۇشىن پرەمەر-ءمينيستردىڭ ءبىرىنشى ورىنباسارى رومان سكليارعا جانە بىرنەشە باسشىعا قاتاڭ سوگىس جاريالاعان بولاتىن.
قانات بوزىمباەۆ كوپتىڭ ەسىندە "قاڭتار وقيعاسى" كەزىندە جاقسى ساقتالعان. قاندى وقيعا كەزىندە الماتى وبلىسىنىڭ اكىمى بولعان بوزىمباەۆ ميتينگىدە كوپ الدىندا بوعاۋىز ءسوز ايتقان. ارتىنشا ول ءوز ارەكەتىن ارانداتۋشىلاردىڭ "ايعايلاعانىنان سوڭ" دەپ تۇسىندىرگەن.
الماتى وبلىسىنىڭ اكىمى لاۋازىمىنان كەيىن تمد-نىڭ ەڭبەك سىڭىرگەن ەنەرگەتيگى پرەزيدەنت كەڭەسشىسى بولىپ تاعايىندالعان.
