Jýrnalıst, QR Májilisiniń depýtaty Ermurat Bápı Qazaqstan Respýblıkasynyń úkimetine, Ulttyq bank tóraǵasynyń atyna ashyq hat joldady. Ashyq hatta elimizdegi 9 banktiń jabylý máselesin kóterip, "qupııa túrde júrip jatqan quıtyrqylyqtardy" synǵa aldy. "Jýsan bank" arqyly halyq qarajatynyń qoldy bolyp otyrǵanyn jetkizdi, dep habarlaıdy "Adyrna" ulttyq portaly.
Depýtat Ermurat Bápı halyq qarjysynyń qalaı "qanalyp otyrǵanyn" baıandady:
- Elde toǵyz bank jabylady degen aqparat tarady. Árıne bul habardyń túpnusqasy Úkimet pen Ulttyq bankten shyqqany daýsyz. Bir jaǵynan eldegi kódedeı kóp bankilerdi qysqartqan da durys shyǵar... Ekinshi jaǵynan, eger «9 bankti jabý» týraly bul jańalyqtyń «jany» bolsa, onyń el ekonomıkasy úshin múmkin bolar zardaby men halyqtyq qazynanyń esepke alynbaǵan shyǵyny týrasynda Parlament Májilisiniń depýtattaryn aqparattandyrý qajet bolady...
Biraq ınsaıderlik aqparat kózderi arqyly maǵan biraz jáıt belgili boldy. Onyń ústine, «Jýsan bankke» qatysty tarıh tarqap bitken joq. Qalaı desek te, zańsyz tólengen júzdegen mıllıon dollar dıvıdendter elge qaıtarylýy tıis, - dedi ol.
Toqaev úkimetin Nazarbaevtardyń túrli joldarmen bopsalap otyrǵanyn jazdy:
- Meniń oıymsha, «Jýsan bankiniń» tóńiregindegi barlyq jumbaq jaǵdaılar jáne 9 bankiniń kenetten jabylýy «Kitaphananyń» burynǵy las tarıhyn jasyrý áreketi men bolashaqqa mıllıondaǵan dollar qor jınaqtap alýdyń amalynan basqa eshteńe emes. Prezıdent Toqaevtyń ákimshiligin halyqaralyq arbıtrajdyq sottar arqyly «qorqytý» – anyǵyna kelgende, Nazarbaev qory men Ulttyq qordyń naqty tonaýshylaryn jasyryp qalýdyń aıla-áreketi. Bul – bos áýreshilik!
Depýtat qyrýar qarjynyń jalǵan sheteldik psevdo-ınvestorlardyń esep-shottary arqyly Nazarbaev áýetine aýdarylǵanyn aıtty:
- Sebebi – bul mıllıondar jalǵan sheteldik psevdo-ınvestorlardyń esep-shottary arqyly Nazarbaevtyń naqty otbasy músheleri men qolastyndaǵy jaqybaılardyń esep-shottaryna aýdarylǵan ("Jýsan bankti" qoldaný arqyly). Bul eks-prezıdenttiń qyzdary men kúıeýbalalaryna, jıenderi men nemerelerine jumystan shyǵý tólemaqysy (vyhodnoe posobıe) sııaqty boldy da shyqty. Eń bastysy – osy shemanyń barlyǵyn oılap taýyp, júzege asyrǵan Kárim Másimov úshin bul «KNB»-nyń tergeý abaqtysynan tólengen aqy boldy.
Keıinnen bul jaǵdaıǵa qatysty mandytyp jaýap bermeı otyrǵan Úkimetti synady:
- Buǵan deıin sizder depýtattarǵa syrǵytpa jaýap berýmen qutylyp keldińizder. Budan bylaı olaı bolmaıdy, máselen, men sizderden kelgen árbir jaýap, eger ol syrǵytpa jáne jaltarma bolsa, ony jalpaq jurtqa jarııa etip otyratyn bolam, - dep jazdy avtor.
Conymen qatar depýtat Qazaqstan baılyǵynyń negizsiz shetke satylyp ketip jatqanyn da synady:
- Máselen, halyqtyń kózin ala bere, úkimet eldiń eń bir qundy aktıvi – Stepnogor taý-hımııa kombınatymen birge orasan zor ýran kenishiniń qoldy bolýyna múmkindik berdi. Bul aktıvtiń quny birneshe mıllıard dollar edi. Reseılik «Rosatom» ony nebári birjarym mıllıardqa aldy.
Osy saýda-sattyqtan Qazaqstan nemese, tym quryǵanda, «Qazatomprom» qansha úles ala aldy? Nól! Qazaqtyń ýran baılyǵynan ony óndirgen kombınat tesik tıyn almady! Bul aktıv búginde Aleksandr Klebanov pen onyń ulyn, Darıǵa Nazarbaevany jáne onyń kúıeýin, balalary men kúıeýbalalaryn, Vasılıı Anısımov degen áldebir Horvatııa azamatyn baıytyp jatyr, - dedi depýtat.
Ashyq hat sońynda depýtat úndeý tastap, halyqtyń nesibesi jaıyn sóz etti:
- Qurmetti Úkimet músheleri, mınıstrler, memlekettik agenttikter men ulttyq korporaııalardyń basshylary, olıgarhtar men ákimshiliktiń sheneýnikteri!
Sizderdiń kesirlerińizden Stepnogor kombınaty men qoldy bolǵan álemdegi eń baı ýran kenishinen qazaq halqy kók tıyn paıda kórmedi! «Jýsan» jalmaǵan jáne basqa bankilerge sizder juttyrǵan birneshe mıllıard dollardan qazaq halqyna eshteńe buıyrmady.
Biz buny aıaqsyz qaldyrmaımyz! - dedi depýtat.
"Adyrna" ulttyq portaly
