«ادىرنا» ۇلتتىق پورتالى «سايلاۋ - 2023» ايدارى بويىنشا پارلامەنت ماجىلىسىنە جانە جەرگىلىكتى ماسلياحتتارعا دەپۋتاتتىققا ۇمىتكەرلەرمەن سۇحباتتار جۇرگىزۋدە. بۇگىن جامبىل وبلىسى، تۇرار رىسقۇلوۆ اۋدانىنىڭ ءماسليحاتىنىڭ دەپۋتاتتىعىنا ۇمىتكەر ساقپانقۋلوۆ ەردوس تىلەپبايۇلىمەن شاعىن سۇحبات قۇرعان ەدىك.
– ەردوس مىرزا، ءسىزدىڭ جامبىل وبلىسى، تۇرار رىسقۇلوۆ اۋدانىنىڭ ءماسليحاتىنىڭ دەپۋتاتتىعىنا ۇمىتكەر رەتىندە تىركەلگەنىڭىزدى بىلەمىز. نە سەبەپتى ءماسليحات دەپۋتاتى بولۋعا شەشىم قابىلدادىڭىز؟
– مەن اۋدانىمىز بەن اۋىلىمىزدىڭ دامۋىنا ءوز ۇلەسىمدى قوسقىم كەلەدى. بۇگىندە اۋىل-اۋدانىمىزدا جينالىپ قالعان ماسەلەلەر شاش-ەتەكتەن. اتاپ ايتقاندا، اۋدانىمىزدىڭ ورتالىق كاناليزاتسيا قۇبىرى ابدەن توزىپ، ىستەن شىعۋدىڭ الدىندا تۇر. اۋداننىڭ كەيبىر اۋماقتارىندا كاناليزاتسيا مۇلدە جلقتىڭ قاسى. بۇل ادامداردىڭ دەنساۋلىعىنا، ءومىر ءسۇرۋ ساپاسىنا كەرى اسەرىن تيگىزەرى ءسوزسىز. كەز كەلگەن مەملەكەتتىڭ ەڭ ءبىرىنشى بايلىعى – ادام جانە ونىڭ دەنساۋلىعى.
ءوزىم قۇرىلىس سالاسىنىڭ مامانى بولعاندىقتان، ءدال وسى ماسەلەنىڭ قىر-سىرىن تەرەڭ بىلەمىن. ەرتەڭ دەپۋتاتتىق مانداتقا يە بولعاندا جۇمىسىمدى ءدال وسى تۇيىتكىلدى شەشۋدەن باستاسام دەيمىن.
اۋدانىمىزدى جاڭا عيماراتتارمەن گۇلدەنىپ-دامۋىنا، الەۋمەتتىك نىسانداردى اباتتاندىرۋعا ءوز ۇلەسىمىزدى قوسسام دەيمىن. اتاپ ايتقاندا، جالپى مەكتەپتەر، سپورت مەكتەپتەرى، ساياجايلار، باۋ-باقشالار جانە تاعى باسقا نىسانداردىڭ سانىڭ ارتۋىنا ەڭبەك ەتەمىن.
جەر-سۋ، جايىلىم ماسەلەلەرى بويىنشا جۇيەلى جۇمىس جۇرگىزۋدى جوسپارلاپ وتىرمىن. جايىلىم جەرلەر كۇننەن كۇنگە تارىلىپ بارادى. بۇل بويىنشا زەرتتەۋلەر جۇرگىزىپ، الداعى ۋاقىتتا ناقتى ۇسىنىستار ازىرلەنەتىن بولادى.
اۋدانىمىز بەن اۋىلدارىمىزدىڭ ەكولوگيالىق ماسەلەسى دە كۇن ساناپ كۇردەلەنىپ بارادى. بۇل بۇكىل الەمدە قالىپتاسىپ وتىرعان جاعداي. بۇكىل ەل بولىپ ءبارىمىز بىرلەسىپ شەشەتىن وزەكتى ماسەلە. ال دەپۋتاتتاردىڭ بۇل ماسەلەنە ءتىپتى بەي-جاي قاراۋىنا بولمايدى.
مۇمكىندىگى شەكتەۋلى ادامدارعا، كوپ بالالى وتباسىلارعا، جەتىمدەر مەن جالعىز باستى انالارعا الەۋمەتتىك كومەك كورسەتۋ، جۇمىسپەن قامتۋ ماسەلەلەرى بويىنشا جەرگىلىكتى مەملەكەتتىك ورگاندارمەن بىرلەسە وتىرىپ زاڭنامالىق جۇمىستار جۇرگىزۋدى جوسپارعان جايىمىز بار.
«اۋىلىم – التىن بەسىگىم» دەگەن قازاقپىز. قازاق ەلىنىڭ بولاشاعى اۋىلدا دەپ ەسەپتەيمىن. سول ءۇشىن قازىردەن باستاپ اۋىلعا دۇرىستاپ كوڭىل ءبولۋىمىز قاجەت.
«يت تويعان جەرىنە، ەر تۋعان جەرىنە...» دەيدى. ءوز تۋعان اۋىلىما قىزمەت ەتۋدى پارىزىم دەپ سانايمىن.
– ءوزىڭىزدى وقىرماندارعا قىسقاشا تانىستىرىپ جىبەرسەڭىز. ەڭبەك جولىڭىزدى دا بىلە وىرساق، ارتىق ەتپەيدى.
– 1985 جىلى تۇرار رىسقۇلوۆ اۋدانىنىڭ كوكدونەن اۋىلىندا دۇنيەگە كەلدىم. ال الماتى قۇرىلىس جانە مەنەدجمەنت كوللەدجى، تاراز ح.م.دۋلاتي ۋنيۆەرسيتەتىندە ينجەنەر قۇرىلىسشى ماماندىعىن وقىپ اياقتادىم. ەڭبەك جولىمدى 2003 جىلى «تاراز قۇرىلىس ديزاينى» مەكەمەسىندە قاراپايىم قۇرىلىسشى بولىپ باستادىم. سودان باستاپ ءارتۇرلى قۇرىلىس كومانيالارىمدى جەمىستى قىزمەت ەتتىم. ودان كەيىن 2017-2018 ج. الماتى وبلىسى، قارعالى اۋىلىنداعى "جان-تايىر ساۋلەت" جشس باسشىسى اتاندىم. 2018-2021 جىلدارى الماتى قالاسى "Stroi SERVICE GROUP KZ" جشس باسشىسى بولدىم. ودان وزگە دە قۇرىلىس سالاسىنا قاتىستى مەكەمەلەردە لاۋازىمدى قىزمەتتەر اتقاردىم. قازىرگى تاڭدا "TuranExpert" جشس باسشىسىمىن جانە الامىت وبلىسى بويىنشا ساراپتاما پالاتاسىنىڭ ايماقتىق وكىلىمىن.
جوعارىدا اتالعان كومپانيالاردىڭ ءبارى دە ساۋلەت، قۇرىلىس، ساراپتاما، گەولوگيالىق بارلاۋمەن تىعىز بايلانىستى مەكەمەلەر.
وسى تاجىريبەممەن، بىلىممەن ەل يگىلىگىنە قىزمەت ەتۋ بارىسىندا بولىسكەندى ءجون كوردىم. سول سەبەپتى، سايلاۋعا تۇسۋگە بەل بۋدىم.
«جاڭا قازاقستان»، «ادىلەتتى قازاقستان» ۇعىمدارىنىڭ شىن مانىندە ەلگە قىزمەت ەتەتىن ۋاقىتى كەلدى. سوزدەن ىسكە كوشەتىن كەز جەتتى! الاش قايراتكەرى ءاليحان بوكەيحان « ۇلتقا قىزمەت ەتۋ – بىلىمنەن ەمەس، مىنەزدەن» دەگەندەي، ءبىز دە ەلىمىزگە قال-قادىرىمىزشە ەڭبەك ەتۋدى مۇرات تۇتىپ وتىرمىن.
اڭگىمەلەسكەن نۇرتاي ەرىكۇلى
