مەملەكەت باسشىسى قاسىم-جومارت توقاەۆ رەسەي فەدەراتسياسىنىڭ پرەزيدەنتى ۆلاديمير ءپۋتيندى توعىزىنشى شاقىرىلىمداعى مەملەكەتتىك دۋما سايلاۋىنىڭ تابىستى وتۋىمەن قۇتتىقتادى. بۇل تۋرالى 21 قىركۇيەكتە اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
پرەزيدەنت اتالعان سايلاۋ رەسەيدىڭ قوعامدىق-ساياسي ومىرىندەگى ماڭىزدى وقيعا ەكەنىن، ال داۋىس بەرۋ ناتيجەسى رەسەيدىڭ ۇزاقمەرزىمدى مۇددەسىن قورعاۋعا باعىتتالعان ۆلاديمير ءپۋتيننىڭ ستراتەگيالىق باعدارىن حالىق كەڭىنەن قولدايتىنىنا ايقىن دالەل بولعانىن اتاپ وتكەن.
«سايلانعان مەملەكەتتىك دۋما دەپۋتاتتارى ازاماتتاردىڭ ءال-اۋقاتىن كوتەرۋ جانە رەسەيدىڭ الەمدىك دەرجاۆا رەتىندەگى الەۋەتىن نىعايتۋ ماقساتىندا ءتيىمدى شارالار مەن شەشىمدەر قابىلدايتىنىنا كۇمان جوق»،–دەلىنگەن قۇتتىقتاۋدا.
جەدەلحاتتا قازاقستان-رەسەي وداقتاستىق قارىم-قاتىناسىنىڭ ماڭىزدى بولىگى رەتىندە پارلامەنتارالىق ىقپالداستىققا ايرىقشا نازار اۋدارىلعان.
قازاقستان پرەزيدەنتى قۇرىلتاي دەپۋتاتتارى مەن رەسەي پارلامەنتاريلەرى ەكى ەل اراسىنداعى سان قىرلى ىنتىماقتاستىق پەن ستراتەگيالىق سەرىكتەستىكتى ودان ءارى دامىتۋ ءۇشىن بىرلەسكەن جۇمىستى بەلسەندى جالعاستىراتىنىنا سەنىم ءبىلدىردى.
قاسىم-جومارت توقاەۆ ۆلاديمير ءپۋتيننىڭ رەسەي فەدەراتسياسىنىڭ وركەندەۋى جولىنداعى مەملەكەتتىك قىزمەتىنە تولايىم تابىس تىلەدى.
