11 ناۋرىزدا ەلوردا تورىندە «سالاۋاتتى ءومىر سالتىن قالىپتاستىرۋ» اكتسياسى ۇيىمداستىرىلدى.
وندا حالىق پارتياسىنىڭ وكىلدەرى مەن تۇرعىندار قالا كوشەلەرىمەن جۇگىرىپ ءوتتى. مارافوننىڭ ماقساتى قالا تۇرعىندارىنا سالاۋاتتى ءومىر سالتىن ناسيحاتتاپ، سپورتپەن اينالىسۋعا شاقىرۋ. سونداي-اق تاياۋ كۇندەرى وتەتىن سايلاۋعا ۇگىت-ناسيحات جۇمىستارىن جۇرگىزۋ.
– قوزعالىس – ءومىردىڭ ءمانى! دارىگەرلەردىڭ ايتۋىنشا، ادام دەنساۋلىعىنىڭ 50 پايىزى سالاۋاتتى ومىرمەن ۇشتاسقان. سوندىقتان دا مىندەتتى تۇردە ارنايى سپورتتىق زالدارعا بارماي-اق، دەنە قوزعالىسىن جاساسا بولادى، – دەدى پارلامەنت ءماجىلىسى دەپۋتاتتىعىنا كانديدات نۇرداۋلەت ورازحانوۆ.
پارتيالىقتار 19 ناۋرىزدا پارلامەنت ءماجىلىسى مەن ءماسليحات دەپۋتاتتارىنىڭ سايلاۋى وتەتىنىن تاعى ءبىر ەسكە سالدى.
"حالىق پارتياسى ءادىل سايلاۋدى قولدايدى. پارتيانىڭ سايلاۋالدى باعدارلاماسىنىڭ نەگىزگى ۇستانىمى – بيلىك پەن بايلىق حالىققا تيەسىلى!", - دەلىنگەن پارتيا تاراتقان مالىمدەمەدە.
"ادىرنا" ۇلتتىق پورتالى
