بۇگىن مولدوۆادا پرەزيدەنت سايلاۋىنىڭ ەكىنشى كەزەڭى ءوتىپ جاتىر، دەپ حابارلايدى «ادىرنا» ۇلتتىق پورتالى BBC-گە سىلتەمە جاساپ.
سايلاۋ ناۋقانىنىڭ فينالىنا قازىرگى مەملەكەت باسشىسى مايا ساندۋ مەن 2021 جىلى ساندۋدىڭ ءوزى قىزمەتىنەن داۋلى تۇردە شەتتەتىلگەن ەلدىڭ بۇرىنعى باس پروكۋرورى الەكساندر ستويانوگلو شىقتى.
ەكى اپتا بۇرىن وتكەن ءبىرىنشى تۋردا سايلاۋ ءفاۆوريتى سانالعان ساندۋ 42,5% داۋىس جينادى. مولداۆيالىقتاردىڭ 26%-عا جۋىعى ونىڭ قارسىلاسىنا داۋىس بەردى.
ءبىرىنشى تۋرداعى وسىنداي ناتيجەلەرگە قاراماستان، باقىلاۋشىلار مايا ساندۋدى شەشۋشى داۋىس بەرۋدىڭ ءفاۆوريتى دەپ اتاۋدان ساقتانۋدا. سەبەبى ونىڭ ەلەكتوراتتى كەڭەيتۋ مۇمكىندىگى وتە از، ال انتيرەيتينگى كەرىسىنشە شامامەن 50%-دى قۇرايدى.
مولدوۆا – پارلامەنتتىك رەسپۋبليكا، جانە رەسمي تۇردە پرەزيدەنتتىڭ سيمۆوليكالىق وكىلەتتىكتەرى عانا بار. الايدا ساندۋعا كەلگەندە بۇل ەرەجە جۇمىس ىستەمەيدى. 2021 جىلعى سايلاۋدا ونىڭ «ارەكەت جانە ىنتىماق» پارتياسى پارلامەنتتە ءابسوليۋتتى كوپشىلىككە يە بولدى، سوندىقتان ول ءىس جۇزىندە دورين رەچان ۇكىمەتىنىڭ جۇمىسىن قاداعالايدى. سونىمەن قاتار، قازىرگى ناۋقاندى كوپتەگەن باقىلاۋشىلار كەلەسى جىلى وتەتىن اسا ماڭىزدى پارلامەنتتىك سايلاۋعا دايىندىق رەتىندە قاراستىرىپ وتىر.
پرەزيدەنت سايلاۋىنىڭ ءبىرىنشى تۋرىندا شامامەن 1,5 ميلليون سايلاۋشى قاتىسقان. سوڭعى اپتادا مولدوۆا قۇقىق قورعاۋ ورگاندارى بۇكىل ەل بويىنشا سايلاۋشىلاردى ساتىپ الۋ سحەمالارىنا بايلانىستى جۇزدەگەن ءتىنتۋ جۇرگىزدى. الايدا، مولداۆيالىق بيلىكتىڭ ايتۋىنشا، بۇل فاكتوردىڭ اسەرىن تولىعىمەن جويۋ مۇمكىن بولماعان.
مولدوۆادا ەكى مىڭعا جۋىق سايلاۋ ۋچاسكەسى تاڭعى ساعات جەتىدە اشىلىپ، كەشكى توعىزعا دەيىن جۇمىس ىستەيدى. شەتەلدە تاعى 234 ۋچاسكە اشىلدى. ولار داۋىس بەرۋ ناتيجەسىنە اسەر ەتۋى مۇمكىن ماڭىزدى فاكتورلاردىڭ ءبىرى بولماق.
پرەزيدەنتتىك سايلاۋدىڭ ءبىرىنشى تۋرىندا شەتەلدەگى مولدوۆانداردىڭ 70%-دان استامى مايا ساندۋعا داۋىس بەرگەن. وسى سايلاۋشىلار ساناتىنىڭ قوسىمشا موبيليزاتسياسى ونىڭ قايتا سايلانۋ مۇمكىندىگىن ايتارلىقتاي ارتتىرۋى مۇمكىن.
مولدوۆادا ەكزيتپول وتكىزىلمەيدى. ەكىنشى تۋردىڭ ناتيجەلەرى تۋرالى اقپارات داۋىستار سانالعان سوڭ، سايلاۋدان كەيىنگى تۇندە جاريالانا باستايدى.
