9 قاراشادا تۇركيانىڭ الانيا قالاسىندا دۇنيەجۇزىلىك جۋرناليستەر كەڭەسىنىڭ (Küresel Gazeteciler Konseyi – KGK) VI ءماجىلىسى اياسىندا عالامدىق جەتىستىك سىيلىعىن تابىستاۋ ءراسىمى ءوتتى. سالتاناتتى شارادا عىلىم سالاسىنداعى Global Elm Award ماراپاتى قازاقستاندىق تاريحشى عالىم سۇلتان حان جۇسىپكە بەرىلدى. ول بۇل سىيلىققا حح عاسىر باسىنداعى الاش تاريحىن قالپىنا كەلتىرۋگە قوسقان ەلەۋلى ۇلەسى ءۇشىن لايىق دەپ تانىلدى، دەپ حابارلايدى «ادىرنا» ءتىلشىسى.
عالىم بىرنەشە ونجىلدىق بويى رەسەي، بەلارۋس، چەحيا جانە قازاقستانداعى مۇراعاتتاردا، كىتاپحانالار مەن مۋزەيلەردە زەرتتەۋ جۇمىستارىن جۇرگىزگەن. سونداي-اق كسرو جانە قازاق كسر مەملەكەتتىك قاۋىپسىزدىك كوميتەتىنىڭ، رەسەي فەدەراتسياسى فەدەرالدىق قاۋىپسىزدىك قىزمەتىنىڭ، قازاقستان ۇلتتىق قاۋىپسىزدىك كوميتەتىنىڭ مۇراعات ماتەريالدارىن زەردەلەگەن. سونىڭ ناتيجەسىندە الاش قوزعالىسىنا قاتىستى قۇندى دەرەكتەردى، سونىڭ ىشىندە ءاليحان بوكەيحاننىڭ عىلىمي اينالىمعا ەنبەگەن مۇراسىن جيناقتاپ، ەل يگىلىگىنە ۇسىنعان.
سۇلتان حان اققۇلىنىڭ ۇزاق جىلدارعا سوزىلعان زەرتتەۋلەرى قازاق تاريحىنداعى اقتاڭداقتاردى اشۋعا، الاش قايراتكەرلەرىنىڭ ءومىرى مەن قىزمەتىن تەرەڭىرەك تانۋعا مۇمكىندىك بەردى. عالىمنىڭ وسى باعىتتاعى ەڭبەگى حالىقارالىق دەڭگەيدە جوعارى باعالانعان.
ايتا كەتەيىك، ماراپاتتاۋ راسىمىنە الەمنىڭ 32 ەلىنەن كەلگەن 350-گە جۋىق جۋرناليست، مەملەكەت جانە قوعام قايراتكەرلەرى، ديپلوماتتار مەن تانىمال تۇلعالار قاتىسقان. ولاردىڭ قاتارىندا كوسوۆونىڭ بۇرىنعى پرەزيدەنتى ۆوسا وسماني، بەلگىلى فۋتبول جاتتىقتىرۋشىسى فاتيح تەريم، TRT Avaz جانە Corendon Airlines كومپانيالارىنىڭ وكىلدەرى بولعان.
"جەر سىلكىنسە دە، ىستامبۇلداعى ”اپالارىمىز” دىم بولماعانداي اقىلىن ساۋدالاپ ءولىپ جاتىر" - اسەم ەرەجەكقىزى
