ىستامبۇلدا فيكيرتەپە اۋدانىنداعى ءزاۋلىم عيمارات ورتەندى، دەپ حابارلايدى “ادىرنا” ءتىلشىسى Oda TV تۇرىك باسىلىمىنا سىلتەمە جاساپ.
24 قاباتتى ۇيدەن ءورتتىڭ شىعۋ سەبەبى ازىرگە بەلگىسىز. زاۋلىم عيماراتتىڭ تومەنگى قاباتتارىندا تۇتانعان ءورت قاپتاما ارقىلى جوعارى قاباتىنا تەز جەتكەن.
ءبىراز ۋاقىتتان كەيىن ءورت سوندىرۋشىلەر جالىندى ءوشىردى. باسىلىم مالىمەتىنشە، عيمارات باقىلاۋعا الىنعان، ىشكى جانە سىرتقى سالقىنداتۋ جۇمىستارى جۇرگىزىلىپ جاتىر.
"فيكيرتەپە ايماعىنداعى كوپقاباتتى ۇيدەن شىققان ءورتتى ءبىزدىڭ ورتسوندىرۋشىلەر باقىلاۋعا الدى. ەۆاكۋاتسيا بارىسىندا ادامدار قازا تاپقان جوق. ءورتتىڭ شىعۋ سەبەبى تەرگەۋدەن كەيىن بەلگىلى بولادى", - دەلىنگەن حابارلامادا.
