فوتو: spacex.com
اقش-تىڭ SpaceX كومپانياسى Starship عارىش كەمەسىن وربيتالىق ۇشۋدان كەيىن جەرگە قايتارىپ، ونى الىپ مەحانيكالىق مانيپۋلياتورلار ارقىلى ءساتتى ۇستاپ قالدى. بۇل – كومپانيانىڭ تولىقتاي قايتا پايدالانۋعا بولاتىن زىمىران جۇيەسىن جاساۋ جولىنداعى ماڭىزدى جەتىستىكتەرىنىڭ ءبىرى. سىناق 14 قاراشادا اقش-تىڭ تەحاس شتاتىنداعى Starbase عارىش ايلاعىندا ءوتتى، دەپ حابارلايدى “ادىرنا”.
SpaceX مالىمەتىنشە، Starship 15-ءشى سىناق ۇشۋى بارىسىندا عارىشتا 22 ساعاتتان استام ۋاقىت بولعان. وسى كەزەڭدە كەمە جەردى 14 رەت اينالىپ، وربيتاعا جاڭا بۋىنداعى 26 Starlink سپۋتنيگىن جەتكىزدى.
وربيتالىق ميسسياسىن اياقتاعان اپپارات جەر اتموسفەراسىنا قايتا ەنىپ، ۇشىرىلىم الاڭىنا قاراي باعىت الدى. قونۋعا جاقىنداعان كەزدە تىك قالىپقا كەلىپ، قوزعالتقىشتارىن ىسكە قوسقان Starship ستارتتىق مۇناراعا جاقىندادى. وسى ساتتە ونى Mechazilla دەپ اتالاتىن الىپ مەحانيكالىق جۇيە ەكى مانيپۋلياتوردىڭ كومەگىمەن ۇستاپ قالدى.
بۇعان دەيىن SpaceX كومپانياسى Super Heavy زىمىران ۇدەتكىشىن وسىنداي تاسىلمەن بىرنەشە رەت ءساتتى قايتارعان ەدى. ال Starship كەمەسىنىڭ وربيتالىق ۇشۋدان كەيىن مۇنارانىڭ مەحانيكالىق مانيپۋلياتورلارىمەن العاش رەت ۇستالىپ وتىرعانى وسى.
الايدا سىناق تولىقتاي ءساتتى ءوتتى دەۋگە كەلمەيدى. ۇشىرىلىمنان كەيىن بولىنگەن Super Heavy ۇدەتكىشى كەرى قايتۋ كەزىندە تەحنيكالىق اقاۋعا تاپ بولىپ، ستارت الاڭىنا قونا المادى. ناتيجەسىندە ول مەكسيكا شىعاناعىنا باعىتتالىپ، كەيىننەن قيراعان. وسىعان بايلانىستى ءبىر ۇشۋ بارىسىندا زىمىراننىڭ ەكى بولىگىن دە قايتارۋ مىندەتى ورىندالمادى.
سوعان قاراماستان، Starship كەمەسىن ءساتتى ۇستاپ قالۋ SpaceX ءۇشىن ماڭىزدى تەحنولوگيالىق قادام سانالادى. كومپانيانىڭ تۇپكى ماقساتى – زىمىراننىڭ ەكى ساتىسىن دا قايتا پايدالانۋ ارقىلى عارىشقا ۇشۋ قۇنىن تومەندەتىپ، جاڭا ميسسيالارعا دايىندىق ۋاقىتىن قىسقارتۋ.
ايتا كەتەيىك، Starship جۇيەسى NASA-نىڭ Artemis باعدارلاماسى اياسىندا ايعا ادام مەن جۇك جەتكىزۋگە ارنالعان جوبالاردىڭ ءبىرى رەتىندە ازىرلەنىپ جاتىر. الداعى ۋاقىتتا بۇل تەحنولوگيانى مارسقا باعىتتالعان ەكسپەديتسيالاردا دا پايدالانۋ كوزدەلگەن.
بۇعان دەيىن، 29 قىركۇيەكتە، SpaceX كومپانياسى Starship كەمەسىن 14-ءشى سىناق ۇشۋى كەزىندە جەر وربيتاسىنا شىعارعان بولاتىن. سول ميسسيا بارىسىندا اپپارات Starlink سپۋتنيكتەرىن جەتكىزگەنىمەن، ونى ۇشىرىلىم الاڭىنا قايتارۋ جوسپارلانباعان ەدى.
