ۆيتسە-پرەزيدەنت ەرلان قارين الماتىداعى ءابۋ ناسىر ءال-ءفارابيدىڭ فيلوسوفيالىق جانە عىلىمي مۇراسىنا ارنالعان حالىقارالىق سيمپوزيۋمدا سويلەگەن سوزىندە قازاقستان – كونە مەملەكەتتەر مەن الىپ يمپەريالاردىڭ مەكەنى عانا ەمەس، بىرەگەي دالا وركەنيەتىنىڭ دە التىن بەسىگى ەكەنىن اتاپ ءوتتى.
«ۇلى دالادا مەملەكەتتىلىكتىڭ تەرەڭ ءداستۇرى قالىپتاستى. ءىرى مادەنيەتتەر مەن دۇنيەتانىمدار ءتۇيىستى. عىلىم مەن ونەردىڭ، رۋحانيات پەن وي-پىكىردىڭ وزىندىك مەكتەبى پايدا بولدى. سول زياتكەرلىك الەۋەتتىڭ ەڭ جارقىن دالەلى – ادامزات ويىنىڭ دامۋىنا ولشەۋسىز ۇلەس قوسقان ۇلى تۇلعالارىمىز ەكەنى انىق. وسى ورايدا ءال-فارابي، ءجۇسىپ بالاساعۇن، قوجا احمەت ياساۋي، اباي، شاكارىم، ءماشھۇر ءجۇسىپ سياقتى عۇلامالاردى ەرەكشە اتاپ وتەمىز. بۇل ءبىزدىڭ «قازاق ەلى، ۇلى دالا – ويشىلدار مەكەنى» دەگەن تۇجىرىمدى ويىمىزدى ودان ءارى قۋاتتاي تۇسەدى. شىنىندا دا، ورتا عاسىرلارداعى ورتالىق ازيا ايماعى ادامزاتتىڭ وركەندەۋىنە ايرىقشا ۇلەس قوسقان وزىق ويلاردىڭ ورداسى بولعان. التايدان اتىراۋعا، ارقادان الاتاۋعا دەيىنگى دارحان دالادا تالاي عۇلاما عالىمدار ءومىر سۇرگەن. ءبىز – سولاردىڭ تەڭدەسسىز ەڭبەكتەرىنىڭ جانە دانالىق داستۇرلەرىنىڭ زاڭدى مۇراگەرىمىز»، – دەدى ەرلان قارين.
ەسكە سالا كەتەيىك، حالىقارالىق ءال-فارابي سيمپوزيۋمعا ەلىمىزدىڭ جانە شەتەلدىڭ 150-دەن استام عالىمدارى، زەرتتەۋشىلەرى، ساراپشىلارى، سونداي-اق جەتەكشى حالىقارالىق ۇيىمداردىڭ وكىلدەرى قاتىسۋدا.
