15 تامىز – قازاق مۋزىكا ونەرىنىڭ كورنەكتى وكىلى، قازاقستاننىڭ حالىق ءارتىسى، كومپوزيتور، «قازاق ءۆالسىنىڭ كورولى» اتانعان ءشامشى قالداياقوۆتىڭ تۋعان كۇنى، دەپ حابارلايدى "ادىرنا" ءتىلشىسى.
بيىل ايگىلى سازگەردىڭ تۋعانىنا 96 جىل تولىپ وتىر.
ءشامشى قالداياقوۆ 1930 جىلى 15 تامىزدا قازىرگى تۇركىستان وبلىسى وتىرار اۋدانىنىڭ ءشاۋىلدىر اۋىلىندا دۇنيەگە كەلگەن. ازان شاقىرىپ قويىلعان ەسىمى – ءجامشيد.
كومپوزيتوردىڭ ونەرگە دەگەن قىزىعۋشىلىعى بالا كەزىنەن باستالعان. ول اكەسىنىڭ دومبىراسى مەن سىرنايىن تارتىپ، كەيىن ماندولينادا ويناعان. مۋزىكاعا دەگەن سۇيىسپەنشىلىگىنىڭ قالىپتاسۋىنا اناسىنىڭ ءان ايتۋى جانە كۇلاش بايسەيىتوۆانىڭ ورىنداۋلارىن تىڭداۋى دا اسەر ەتكەن.
ءشامشى قالداياقوۆ العاشقى ءبىلىمىن قاپلانبەك زووۆەتەرينارلىق تەحنيكۋمىندا الىپ، كەيىن اسكەري ۋچيليششەدە، تاشكەنتتەگى حامزا نيازي اتىنداعى مۋزىكا ۋچيليششەسىندە ءبىلىم العان. سونداي-اق قازاقتىڭ قۇرمانعازى اتىنداعى مەملەكەتتىك كونسەرۆاتورياسىندا كومپوزيتورلىق ماماندىق بويىنشا وقىدى. كەيىن س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىندە دە ءبىلىم العان.
سازگەردىڭ شىعارماشىلىق مۇراسى قازاق مۋزىكاسىنىڭ التىن قورىنان ەرەكشە ورىن الادى. ونىڭ «مەنىڭ قازاقستانىم»، «ارىس جاعاسىندا»، «اقماڭدايلىم»، «انا تۋرالى جىر»، «باقىت قۇشاعىندا» سەكىلدى اندەرى حالىق اراسىندا كەڭىنەن تانىلدى.
ءشامشى قالداياقوۆتىڭ «مەنىڭ قازاقستانىم» ءانى 2006 جىلى قازاقستان رەسپۋبليكاسىنىڭ مەملەكەتتىك ءانۇرانىنىڭ نەگىزىنە اينالدى. ءانۇراننىڭ مۋزىكاسىن كومپوزيتوردىڭ اۋەنى، ال ءسوزىن جۇمەكەن ناجىمەدەنوۆ پەن نۇرسۇلتان نازارباەۆ جازعان.
كومپوزيتورعا قازاقستاننىڭ حالىق ءارتىسى اتاعى 1991 جىلى، ءومىرىنىڭ سوڭىنا از ۋاقىت قالعاندا بەرىلدى.
ءشامشى قالداياقوۆ 1992 جىلى الماتى قالاسىندا دۇنيەدەن ءوتتى. ونىڭ شىعارمالارى بۇگىندە دە قازاق مۋزىكاسىنىڭ اجىراماس بولىگى رەتىندە ورىندالىپ، كەيىنگى ۇرپاققا رۋحاني مۇرا بولىپ كەلەدى.
