15 tamyz – qazaq muzyka önerınıŋ körnektı ökılı, Qazaqstannyŋ halyq ärtısı, kompozitor, «qazaq valsınıŋ korolı» atanǧan Şämşı Qaldaiaqovtyŋ tuǧan künı, dep habarlaidy "Adyrna" tılşısı.
Biyl äigılı sazgerdıŋ tuǧanyna 96 jyl tolyp otyr.
Şämşı Qaldaiaqov 1930 jyly 15 tamyzda qazırgı Türkıstan oblysy Otyrar audanynyŋ Şäuıldır auylynda düniege kelgen. Azan şaqyryp qoiylǧan esımı – Jämşid.
Kompozitordyŋ önerge degen qyzyǧuşylyǧy bala kezınen bastalǧan. Ol äkesınıŋ dombyrasy men syrnaiyn tartyp, keiın mandolinada oinaǧan. Muzykaǧa degen süiıspenşılıgınıŋ qalyptasuyna anasynyŋ än aituy jäne Küläş Baiseiıtovanyŋ oryndaularyn tyŋdauy da äser etken.
Şämşı Qaldaiaqov alǧaşqy bılımın Qaplanbek zooveterinarlyq tehnikumynda alyp, keiın äskeri uchilişede, Taşkenttegı Hamza Niiazi atyndaǧy muzyka uchilişesınde bılım alǧan. Sondai-aq Qazaqtyŋ Qūrmanǧazy atyndaǧy memlekettık konservatoriiasynda kompozitorlyq mamandyq boiynşa oqydy. Keiın S.M. Kirov atyndaǧy Qazaq memlekettık universitetınıŋ jurnalistika fakultetınde de bılım alǧan.
Sazgerdıŋ şyǧarmaşylyq mūrasy qazaq muzykasynyŋ altyn qorynan erekşe oryn alady. Onyŋ «Menıŋ Qazaqstanym», «Arys jaǧasynda», «Aqmaŋdailym», «Ana turaly jyr», «Baqyt qūşaǧynda» sekıldı änderı halyq arasynda keŋınen tanyldy.
Şämşı Qaldaiaqovtyŋ «Menıŋ Qazaqstanym» änı 2006 jyly Qazaqstan Respublikasynyŋ Memlekettık Änūranynyŋ negızıne ainaldy. Änūrannyŋ muzykasyn kompozitordyŋ äuenı, al sözın Jūmeken Näjımedenov pen Nūrsūltan Nazarbaev jazǧan.
Kompozitorǧa Qazaqstannyŋ halyq ärtısı ataǧy 1991 jyly, ömırınıŋ soŋyna az uaqyt qalǧanda berıldı.
Şämşı Qaldaiaqov 1992 jyly Almaty qalasynda dünieden öttı. Onyŋ şyǧarmalary bügınde de qazaq muzykasynyŋ ajyramas bölıgı retınde oryndalyp, keiıngı ūrpaqqa ruhani mūra bolyp keledı.
