بۇگىن كورنەكتى عالىم، جازۋشى، اۋدارماشى جانە قوعام قايراتكەرى ەۆنەي ارىستانۇلى بوكەتوۆتىڭ تۋعانىنا 100 جىل تولدى.
ول – قازاق عىلىمىنىڭ دامۋىنا، ادەبيەتىنە جانە ءبىلىم سالاسىنا ولشەۋسىز ۇلەس قوسقان دارا تۇلعا.
ەۆنەي بوكەتوۆ – حيميا عىلىمدارىنىڭ دوكتورى، قازاق كسر عىلىم اكادەمياسىنىڭ كوررەسپوندەنت-مۇشەسى. ونىڭ زەرتتەۋلەرى مەتاللۋرگيا سالاسىنا تىڭ جاڭالىقتار اكەلدى.
ول باسقارعان ۇجىم بەس بىردەي اۆتورلىق كۋالىككە يە بولىپ، كانادا، اقش، اۋستراليا، شۆەتسيا، فرانتسيا، گەرمانيا، جاپونيا، يتاليا ءتارىزدى ەلدەر پاتەنت تاپسىرعان. وسى ينستيتۋتتا ءتۇرلى ءتۇستى، سيرەك جانە بىتىراڭكى مەتالدار زەرتحاناسىن اشادى. بۇل قازاقستان عىلىمى ءۇشىن كۇتپەگەن جاڭالىق ەدى. ءوزى باسقارعان وسى زەرتحانادا موليبدەن، ۆولفرام، سەلەن جانە تەللۋر بويىنشا زەرتتەۋلەر جۇرگىزگەن.
ول 100-دەن استام عىلىمي ەڭبەك جازىپ، ونەرتابىستارىمەن ءوندىرىستىڭ دامۋىنا ۇلەس قوستى.
بوكەتوۆ – قازاقستانداعى جوعارى ءبىلىمنىڭ دامۋىنا ۇلەس قوسقان بىرەگەي تۇلعا. ول 1972 جىلى قاراعاندى مەملەكەتتىك ۋنيۆەرسيتەتىنىڭ نەگىزىن قالاپ، العاشقى رەكتورى بولدى. قازىرگى تاڭدا بۇل وقۋ ورنى عالىمنىڭ ەسىمىمەن اتالادى.
ادەبيەت سالاسىندا ەۆنەي بوكەتوۆ اباي مەن مۇحتار اۋەزوۆ شىعارمالارىن تالداپ، ءبىرسىپىرا تۋىندىلار جازعان سارابدال سىنشى. سونداي-اق، سەرگەي ەسەنيننىڭ "اننا ونەگينا" پوەماسىن، ۆلاديمير ماياكوۆسكيدىڭ ولەڭدەرىن انا تىلىمىزدە سويلەتكەن تاماشا اۋدارماشى.
