بۇگىن، 29 قازاندا قازاق بوكسىنىڭ نەگىزىن قالاۋشىلاردىڭ ءبىرى، قازاق كسر-ءىنىڭ ءۇش مارتە چەمپيونى جانە سپورت شەبەرى اتاعىن العان العاشقى قازاق سپورتشىسى شوقىر بولتەكۇلىنىڭ تۋعانىنا 110 جىل تولىپ وتىر، دەپ حابارلايدى «ادىرنا» ءتىلشىسى.
ول 1916 جىلى 29 قازان كۇنى ماڭعىستاۋ وبلىسى، جارمىش اۋىلىنىڭ ماڭىندا سارقاۋاق دەگەن جەردە دۇنيەگە كەلگەن.
وتىزىنشى جىلدارداعى اشارشىلىق، الاساپىران تۇستا فورت-شەۆچەنكو قالاسىنداعى جەتىمدەر ۇيىندە وقىپ, ورتا مەكتەپتى بىتىرگەن. بايۇلى تايپاسىنىڭ بەرىش رۋىنىڭ قۇلكەش بولىمىنەن شىققان. ۇلى وتان سوعىسىنا قاتىسقان ول 1944 جىلى جاراقاتتانىپ ەلگە ورالعان.
شوقىر بولتەكۇلى رينگتە 223 كەزدەسۋ وتكىزگەن, ونىڭ 199-ىندا جەڭىسكە جەتكەن. 1947 جىلى كيەۆتەگى كوركەمسۋرەت اكادەمياسىن جانە دەنە تاربيەسى ينستيتۋتىن بىتىرگەن. 50-جىلدارى قازاق كسر-ءىنىڭ ءۇش دۇركىن چەمپيونى اتانعان.
شارشى الاڭنىڭ شاڭىن قاققان بوكسشى ءىزباسار شاكىرتتەر تاربيەلەپ, ولاردى بوكسقا باۋلۋءۇشىن الاقانداي الاڭ ىزدەگەن. وسىلايشا وپەرا جانە بالەت تەاترىنىڭ ءبىر بولمەسىن سۇراپ العان. 1937 جىلى شوقىر بولتەكۇلىنىڭ باسشىلىعىمەن بوكستان الماتى قالاسىنىڭ رەسمي ءبىرىنشى كەزەكتىگى وتكىزىلگەن. وعان 50 سپورتشى قاتىسقان.
1947 جىلى ماسكەۋدە وتكەن كەڭەستەر وداعىنىڭ بىرىنشىلىگىنە قازاق ەلىنىڭ قۇراما كومانداسىن شوقىر اتامىز باستاپ بارعان. ونىڭ مەكتەبىنەن ماقسۇت وماروۆ، ءابدىسالان نۇرماحانوۆ، سەرىك ابدىناليەۆ، ۆيكتور جانە ۆلاديمير كاريموۆتار، اسقار قۇلىباەۆ سەكىلدى تالانتتى شاكىرتتەر تاربيەلەنىپ شىققان.
شوقىر بولتەكۇلى 1994 جىلى 78 جاسىندا الماتى قالاسىندا دۇنيەدەن وزعان.
