بىرنەشە كۇننەن بەرى مۇڭعۇليادا تۇراتىن مۇڭعۇلدار مەن قازاقتاردىڭ اراسىندا لاپ ەتكەن داۋ ۋشىعىپ، ءبىراز جەرگە دەيىن جەتتى.
ەكەۋى دە دالا مىنەزدى، ىقىلىم زاماننان بەرى ءبىر تاۋدىڭ ءار جاعىندا كوشىپ-قونىپ جۇرگەن تاريحى ورتاق، تاۋدىڭ تاعى بولمىسى بار حالىق قوي، ءبىر - بىرىنە قىرعيداي تيگەندە مىنا جاقتا وتىرىپ، سول دالانىڭ تۋماسى بولعاندىقتان، بىردەڭە دەپ قالعىڭ كەلەدى ەكەن. داۋدى باستاعان نارىنتۇياا دەگەن دەپۋتات، اكتريسا ايەل، ياعني، ول باي-ولكە ايماعىندا قازاقستان ەلشىلىگىنىڭ كونسۋلى اشىلۋىنا قارسى ەكەن، ونىڭ ويىنشا، ول ماسەلەنى مۇڭعۇلدار بىرجاقتى شەشۋى كەرەك، وزگەلەردىڭ حۇقى جوق.
سول-اق ەكەن، جەرگىلىكتى حالقالار شيبورىدەي شۋلاپ قويا بەردى. قازاقتىڭ ادرەسىنە قاراتا ايتىلعان ۇلتتىق نامىستى قورلايتىن سوزدەردىڭ نە ءتۇرى كەتىپ جاتىر: "قازاقستانىڭا كەت، بۇل مەنىڭ جەرىم، موڭعولشا سويلە، قازاقشا جازبا!.." ت.ب.
ال، مىنا جاقتا، بولسا، ياعني، قازاقستاندا ءبىر ورىس قاتىن قازاقتىڭ قىزىنا قازاق جەرىندە تۇرىپ، بوتەن مەملەكەتتىڭ تىلىندە جاۋاپ بەرۋىن تالاپ ەتىپ دىكەڭدەپ ۇرسىپ جاتتى...
مەن بۇل ەكى وقيعادان ءبىرى - باسقانىڭ جەرىندە ءومىر سۇرۋگە ءماجبۇر بولعانى ءۇشىن پۇشايمان كۇي كەشكەن ار جاقتاعى قازاق پەن ءبىرى - ءوزىنىڭ رەسمي جەرىندە وتىرىپ، كىرمە ۇلتتىڭ باسىنعان باسقىنشىلىعىن كورىپ وتىرعان بەرگى جاقتاعى قازاقتىڭ، جالپى قازاقتىڭ ورتاق ۇلتتىق پروبلەماسىن كورىپ وتىرمىن.
ەەح... مەنىڭ حالقىم نە دەگەن تاعدىر-تالايلى ۇلت ەدى؟
مەن ءۇشىن جۇرەگىمدى اۋىرتاتىنى - وسى ەكى جاقتاعى قازاقتىڭ تاعدىرى مەن تاريحىنىڭ ىشىندە مەنىڭ دە بار ەكەنىم... ولە-ولگەنشە جۇرەتىنىم...
وعان، ەگەر، و جاقتا بولسام، "حاساگ", "قازاقستانىڭا كەت" دەيتىندەرىن ەستۋمەن بولاتىنىمدى، مىنا جاقتا العاش "قازاعىم" دەپ كوشىپ كەلگەن جىلدارى "موڭعولدار", "موڭعوليالارىڭا كەتە بەرمەيسىڭدەر مە!" دەپ شۇقىلاپ، ساۋساقتارىن شوشايتقان كەزدەر بولعانىن قوسىپ قويىڭىز.
بالا كەزىمدە بۇلعىن سۇمىنىندا تاۋدىڭ توبەسىنە شىقساڭ، ار جاعىنان قىتايلار كورىنەدى دەسە، باي -ولكە ايماعىندا تاۋدىڭ ار جاعىندا ورىستار بار دەيتىن سويتسەم، سول ورىس پەن قىتاي مەنشىكتەپ (تارتىپ) العان جەرلەر، ءبىر تاۋدىڭ ءار جاعىندا شاشىلىپ قالعان قازاقتىڭ ءوز جەرلەرى ەكەن عوي. مىنا داۋدىڭ دا ءتۇپ-توركىنى سول ءبىر قازاقتى سان قازاققا بولشەكتەپ، قۇيقالى جەرلەرىن كەزىندە ستالين، ما -تسزە -دۋن، چويبالساندار (چويبالساننىڭ پالەندەي ءرولى جوق شىعار) ءتورت ەلگە ءبولىپ تاستاۋ دەيتىن قيتۇرقى ساياساتتا جاتقان جوق پا؟!
و، قۇدايىم! مەنى ەشكىم الالاپ بولمەيتىن، وكتەمسىپ باسىنبايتىن، ايتىسىپ تارتىسپايتىن ءبىر مەكەن بار ما ەكەن، مىنا جەر بەتىندە؟! بولسا عوي، كوزىمدى جۇمىپ، قۇلاعىمدى باسىپ، الدى-ارتىما قاراماي بەزىپ كەتكىم كەلەدى. جانە مەنىڭ قايدا، قالاي ءومىر سۇرەتىنىمدى ەشكىم نۇسقامايتىن جاققا!
جەتەدى.
ءتۇيىن:
اركىمنىڭ ءوز ويىن ايتۋعا قۇقى بار. بىراق، مەملەكەتتىك، حالىقارالىق ىستەردى جەڭىلتەك جەكەلەگەن پىكىرلەر ەمەس، مەملەكەتارالىق سالماقتى قارىم-قاتىناستار شەشەدى.
