قازىر ەلىمىزدە قۇرىلىس سانى ارتتى. جاقىن ارالىقتا ءتىپتى قۇرىلىس كوبەيمەك. مەكتەپتەر، اۋرۋحانا، ەمحانا، جول، تەمىرجولدار سالىنىپ جاتىر. اۋەجايلار دا بوي كوتەرۋدە. جاقىندا عانا ارقالىقتا اۋەجاي اشىلدى. ءدال سونداي اۋەجاي بىرنەشە ايماقتا سالىنىپ جاتىر. سونىمەن بىرگە سۋ قۇبىرلارى، ەنەرگەتيكا نىساندارى، ءوندىرىس وشاقتارى دا سالىنۋدا. قۇرىلىستىڭ كوپ بولعانى جاقسى.
بىرىنشىدەن، بۇل جۇمىس ورنى دەگەن ءسوز. قۇرىلىس نىسانىن سالۋعا سول ايماقتىڭ حالقى جۇمىسقا تارتىلادى. ەكىنشىدەن، ءوندىرىس وشاقتارىنا دا تاپسىرىس ارتادى. قۇرىلىسقا قاجەتتى تاس، تسەمەنت، تەمىر جانە باسقانى شىعارۋ كوبەيەدى. ول ماتەريالدى تاسۋ ءۇشىن ترانسپورت سالاسىنداعى ماماندارعا تاپسىرىس ارتادى. ولار دا جۇمىسقا يە بولادى. قىزمەت كورسەتۋ سالاسىنىڭ دا ساۋداسى جۇرەدى دەگەندەي. جالپى ءىرى قۇرىلىس نىسانى تىزبەكتى دەڭگەيدە بىرنەشە سالاعا جۇمىس بەرەدى عوي. وسىلاي كەتە بەرەدى.
اۋقىمدى قۇرىلىستار مەملەكەت ەسەبىنەن جۇرگىزىلەدى. جولدار، كوپىرلەر، بوگەتتەر مەن مەكتەپتەر سالىنادى. بۇل ازاماتتاردى جۇمىسپەن قامتۋعا سەپ بولادى. قۇرىلىستىڭ كوپ بولۋى ەسەبىنەن زاۋىتتارعا تاپسىرىس ارتادى. بۇل ءوز كەزەگىندە قۇيىلاتىن ينۆەستيتسيانى ۇلعايتادى.
وسىلايشا ەكونوميكانىڭ ناقتى سەكتورىنا قارجى اعىمى ۇلعايا بەرەدى. حالىق قاراجاتىنىڭ ءبىر بولىگىن تاۋار الۋعا جۇمسايدى. سايكەسىنشە ساۋدا جانە قىزمەت كورسەتۋ سالاسىنا قاتىستى تاپسىرىس تا ارتادى.
اۋقىمدى قۇرىلىستار ءبىر جاعىنان حالىقتى جۇمىسپەن قامتۋعا، ال ءبىر جاعىنان ينفراقۇرىلىمدى جاڭارتۋعا، ەندى ءبىر جاعىنان اقشا ءتۇسىمىن ارتتىرۋعا سەبەپكەر بولادى.
جالپى اۋقىمدى قۇرىلىس نىساندارى تەك ءبىر عيمارات سالۋ، قۇبىر توسەۋمەن شەكتەلمەيدى. ول تىزبەكتى رەاكتسيا رەتىندە ەكونوميكانىڭ ءتۇرلى سالاسىنا جان بىتىرەدى. ىشكى سۇرانىستى ارتتىرادى (زاۋىتتارعا), قىزمەت كورسەتۋ سالاسىن كۇشەيتەدى (ترانسپورت پەن تاسىمالداۋ سالاسى، جول بويىنداعى اسحانا جانە باسقا دەگەندەي), ينفراقۇرىلىمدى كۇشەيتەدى. باستىسى سالىناتىن نىسانداردىڭ ساپاسىن، قاجەتتىلىگىن جانە قارجىلىق سيپاتىن قاتاڭ قاداعالاپ وتىرۋ كەرەك. سالىناتىن نىساننىڭ سول ايماققا قاجەتتىلىگىن دە زەرتتەۋ ماڭىزدى. مىسالى 20 ادام تۇراتىن اۋىلعا ملرد تەڭگەلىك مەكتەپ سالىپ قويماۋ كەرەك دەگەندەي عوي. وسىنداي تۇستارىن باقىلاپ، ناقتى ەسەپپەن جۇرگىزىلسە، اۋقىمدى قۇرىلىستار ەكونوميكا ءۇشىن وتە ماڭىزدى قوزعاۋشى كۇش بولا الادى.
