قازاقستان مەن ءازىربايجان پرەزيدەنتتەرى قاسىم-جومارت توقاەۆ پەن يلحام اليەۆ شۋشا قالاسىنا باردى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەپ.
«ەكى ەل پرەزيدەنتتەرى قاراباق تاۋ جوتاسىنىڭ باۋرايىندا ورنالاسقان قالانىڭ باس جوسپارىمەن تانىستى. سودان كەيىن ولار ايماقتىڭ كورنەكتى جەرلەرىن، ونىڭ ىشىندە ورتالىق الاڭدى، «سااتلى» مەشىتىن، تاۋ قىراتىنداعى «دجىدىر ديۋزيۋ» الاڭىن، «بيۋل-بيۋل» مۇراجاي-ءۇيىن، جالپىۇلتتىق كوشباسشى گەيدار اليەۆتىڭ 100 جىلدىعىنا وراي ۇيىمداستىرىلعان فوتوكورمەنى جانە تاعى دا باسقا تاريحي ورىنداردى ارالاپ كوردى»، - دەلىنگەن حابارلامادا.
ءازىربايجان باسشىسى اتاپ وتكەندەي، شۋشا ەجەلدەن ءازىربايجان مادەنيەتىنىڭ بەسىگى سانالعان. قالا ءوزىنىڭ وركەندەۋ كەزەڭىندە پوەزيانىڭ، ونەردىڭ جانە ساۋلەت ونەرىنىڭ دامىعان ورنى بولدى.
«بۇگىندە مۇندا ينفراقۇرىلىم سالۋ جانە قالپىنا كەلتىرۋ جۇمىستارى قارقىندى ءجۇرىپ جاتىر. قازىردىڭ وزىندە بىرنەشە قوناق ءۇي، مۋزەي جانە مەشىتتەر بوي كوتەرگەن. تۇرعىن ۇيلەر، ءبىلىم بەرۋ مەكەمەلەرى، الەۋمەتتىك نىساندار، شىركەۋلەر سالىنىپ، جوندەلۋدە. سونىمەن قاتار ءتۇرلى سالا ماماندارىنىڭ قاتىسۋىمەن نىسانداردى باعالاۋ جانە تۇگەندەۋ جۇمىستارى جۇرگىزىلىپ جاتىر»، - دەپ تولىقتىردى اقوردا.
