گروزنىي قالاسىنداعى گەيدار اليەۆ اتىنداعى سكۆەردە «ازەربايجان اۋە جولدارىنا» تيەسىلى ۇشاق اپاتىنان قازا تاپقان جولاۋشىلاردىڭ قۇرمەتىنە مەموريالدىق ەسكەرتكىش ورناتىلدى، دەپ حابارلايدى "ادىرنا" ۇلتتىق پورتالى ريا-عا سىلتەپ.
ەسكەرتكىشتىڭ اشىلۋ سالتاناتىندا شەشەنستان باسشىسى مەن ۇكىمەتى اكىمشىلىگىنىڭ جەتەكشىسى گالاس تايماسحانوۆ ءسوز سويلەپ، اۋە اپاتىنىڭ بارشا جۇرت ءۇشىن اۋىر قايعى بولعانىن اتاپ ءوتتى.
"بۇل اپات بارلىعىمىز ءۇشىن اسا اۋىر حابار بولدى. بۇگىن ءبىز «باكۋ – گروزنىي» رەيسىنىڭ قازا تاپقان جولاۋشىلارىنىڭ رۋحىنا تاعزىم ەتىپ، مەموريالدىق تاقتانى اشىپ وتىرمىز", – دەدى ول.
ءىس-شاراعا ازەربايجاننىڭ رەسەيدەگى ەلشىسى راحمان مۇستافاەۆ قاتىستى.
ەسكە سالايىق، اۋە اپاتى 2024 جىلعى 25 جەلتوقساندا بولدى. «ازەربايجان اۋە جولدارى» كومپانياسىنا تيەسىلى Embraer E190 ۇشاعى باكۋدەن ۇشىپ شىعىپ، ازەربايجانعا باعىت العان كەزدە اقتاۋ ماڭىندا اپاتقا ۇشىراعان. قايعىلى وقيعا سالدارىنان 38 ادام قازا تاۋىپ، 29 جولاۋشى ءتىرى قالعان.
ازەربايجان پرەزيدەنتى يلحام اليەۆ ۇشاقتىڭ قۇلاۋىنا رەسەي تاراپىنىڭ قاتىسى بار ەكەنىن مالىمدەگەن ەدى. كەيىنىرەك رەسەي پرەزيدەنتى ۆلاديمير پۋتين رەسەيدىڭ اۋە كەڭىستىگىندە بولعان وقيعاعا بايلانىستى كەشىرىم سۇرادى.
1 شىلدەدە ازەربايجاندىق باق رەسەيدىڭ اۋە شابۋىلىنا قارسى قورعانىس جۇيەسىنىڭ كاپيتانىنىڭ ۇشاقتى اتىپ ءتۇسىرۋ جونىندەگى بۇيرىققا قاتىستى تۇسىندىرمە جازباسىن جاريالادى. ال 9 قازاندا ۆلاديمير پۋتين رەسەيلىك پۆو جۇيەلەرى «ازەربايجان اۋە جولدارى» ۇشاعىنا وق اتقانىن رەسمي تۇردە مويىندادى.
