قازاقستاندا «قازتاگ» پەن «فريدوم فينانس» اراسىنداعى داۋعا قاتىستى سوت قاراۋى باستالدى.
ءىس ماتەريالدارىنا سايكەس «قازتاگ» اگەنتتىگىنىڭ باس رەداكتورى ءامىر قاسەنوۆ «فريدوم فينانس» اق-عا قارسى اۋقىمدى اقپاراتتىق ناۋقان ۇيىمداستىردى دەپ ايىپتالۋدا. ال اگەنتتىكتىڭ باس ديرەكتورى اسەت ماتاەۆقا كوممەرتسيالىق ۇيىمداعى باسقارۋ فۋنكتسيالارىن تيىسىنشە ورىنداماعانى ءۇشىن جانە بۇزاقىلىق بويىنشا ايىپ تاعىلىپ وتىر.
«فريدوم فينانس» كومپانياسىنىڭ مالىمدەۋىنشە، 2025 جىلى «قازتاگ» اگەنتتىگى كومپانياعا قارسى اقپاراتتىق شابۋىل ۇيىمداستىرىپ، الاياقتىق، قارجى پيراميداسىن قۇرۋ جانە كليەنتتەردىڭ قاراجاتىن زاڭسىز شىعارۋ تۋرالى ايىپتاۋلار قامتىلعان تەرىس سيپاتتاعى ماتەريالدار جاريالاعان.
ال تەرگەۋدىڭ مالىمەتىنە سايكەس، «قازتاگ» اگەنتتىگىنىڭ باس ديرەكتورى اسەت ماتاەۆ باسقارۋشىلىق مىندەتتەرىن تيىسىنشە ورىنداماي، رەداكتسيا قىزمەتىنە قاجەتتى باقىلاۋدى قامتاماسىز ەتپەگەن. سونىڭ سالدارىنان تەرگەۋ دەرەگىنشە، «فريدوم فينانس» كومپانياسى ءۇشىن اۋىر زارداپتارعا اكەپ سوققان زاڭ بۇزۋشىلىقتارعا جول بەرىلگەن.
اسەت ماتاەۆ، سونداي-اق، بۇزاقىلىق ءۇشىن دە جاۋاپقا تارتىلىپ وتىر.
ەسكە سالساق، 2026 جىلعى 17 ناۋرىزدان 18 ناۋرىزعا قاراعان ءتۇنى الماتى قالاسىنداعى «Dostyk Plaza» ساۋدا ويىن-ساۋىق ورتالىعىنىڭ ماڭىندا ماتاەۆ تانىسىمەن بىرگە الكوگولدىك ىشىمدىك ىشكەن كۇيدە 20 جاستاعى ەكى جىگىتپەن جانجالداسىپ، كەيىن ول توبەلەسكە ۇلاسقان.
تەرگەۋ مالىمەتىنشە، اسەت ماتاەۆتىڭ ارەكەتتەرىنە كۇش قولدانۋمەن ۇشتاسقان، ادامدار توبى جاساعان بۇزاقىلىق دەگەن قۇقىقتىق باعا بەرىلىپ وتىر.
بۇعان دەيىن «فريدوم فينانس» كومپانياسى «قازتاگ» باسشىلىعى ءوز كىناسىن مويىنداعان جاعدايدا تاتۋلاسۋعا دايىن ەكەنىن مالىمدەگەن بولاتىن.
