بۇگىن تاۋەلسىز جۋرناليست، KazTAG حالىقارالىق اقپاراتتىق اگەنتتىگىنىڭ جەتەكشىسى، اسەت ماتاەۆ الماتىداعى №5 ءبىر مانداتتى وكرۋگ بويىنشا قر پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىنا ءوز كانديداتۋراسىن ۇسىناتىنىن مالىمدەدى (ەسكەرتپە. - بوستاندىق، مەدەۋ، ناۋرىزباي اۋداندارى - ءا.ماتاەۆ تۇرعان، تۇراتىن جانە جۇمىس ىستەيتىن اۋداندار). بۇل تۋرالى اسەت ماتاەۆ Facebook-تەگى رەسمي پاراقشاسىندا، سونداي-اق جەكە Telegram-ارناسىندا جازدى، دەپ حابارلايدى “ادىرنا” ۇلتتىق پورتالى.
جازبادا التى اي بۇرىن جوعارعى سوت قازتاگ جانە قازاقستان جۋرناليستەر وداعىنىڭ جەتەكشىلەرى اسەت پەن سەيتقازى ماتاەۆتاردان زاڭسىز سوتتاعانى ءۇشىن مەملەكەت اتىنان كەشىرىم سۇراعانى جانە مۇنداي جايت تاۋەلسىز قازاقستان تاريحىندا العاش رەت ورىن العانى ايتىلعان.
⠀ء"بىر كەزدەرى ساياسي سەبەپتەرمەن باستالعان قىلمىستىق ءىس باس پروكۋراتۋرا قىزمەتكەرلەرىنىڭ مۇقيات تەكسەرىسىنەن كەيىن جويىلدى جانە قازىر جوعارعى سوتتىڭ بيۋللەتەنىندە زاڭسىز سوتتاۋدىڭ مىسالى رەتىندە جاريالانىپ جاتىر. مەنىڭ تۇسىنىگىمدە ادىلەتتى قازاقستان دەگەنىمىز وسى - بارلىق ادام قۇقىعى زاڭمەن قورعالىپ، قىلمىس اياۋسىز جازالاناتىن ەل", - دەپ جازدى ا.ماتاەۆ.
سونىمەن قاتار ول ءوزىنىڭ اتىنا مەملەكەتتىك ورگانداردىڭ زاڭسىز ءىس-ارەكەتتەرىنە قاتىستى حالىقتان كوپ شاعىم تۇسەتىنىن جانە سول ءوتىنىش-شاعىمداردىڭ بارلىعىن جان-جاقتى تەكسەرۋ قاجەت ەكەنىن اتاپ ءوتتى.
"مەنى سوڭعى كەزدەرى ءوزىمنىڭ قالامداس ارىپتەستەرىمە، ياعني تىلشىلەرگە قاتىستى ءسوز بوستاندىعىن شەكتەپ، ادىلدىكتى بەلدەن باسۋ وقيعالارىنىڭ كوبەيىپ كەتكەنى قاتتى الاڭداتادى. ويتكەنى، مۇنداي تاۋقىمەتتى ءبىزدىڭ وتباسىمىز دا تالاي مارتە باسىنان كەشىرگەن. ءسوز بوستاندىعى جولىندا باسىمىزدى بايگەگە تىگىپ، ءبىراز ءومىرىمىزدى تارك ەتتىك. دەنساۋلىعىمىزعا دا قانداي نۇقسان كەلگەنى ايتپاسا دا تۇسىنىكتى. سوڭعى جىلدارى ءبىز مەنىڭ ارىپتەستەرىمە، جۋرناليستەرگە جانە قوعام بەلسەندىلەرىنە جاسالعان قاتىگەز سوققىلارعا كۋا بولدىق", - دەلىنگەن حابارلامادا.
اسەت ماتاەۆتىڭ سوزىنشە، ادامدار وعان وڭىرلەر مەن ورتالىق مەملەكەتتىك ورگاندارداعى كادرلىق شەشىمدەرگە قاتىستى سۇراقتاردى، كوممۋنالدىق سالاداعى پروبلەمالار مەن سىبايلاس جەمقورلىققا قاتىستى سۇراقتاردى ءجيى قويادى ەكەن. ۇكىمەت پەن پارلامەنتكە جاڭا كوزقاراستاعى بەلسەندى ادامدار قاجەت. مەملەكەتتىك اپپارات بيۋروكراتيا مەن قاعازباستىلىققا كومىلىپ قالدى. شۇعىل شەشىمدەر قابىلداۋ بىلاي تۇرسىن، موينىنا جاۋاپكەرشىلىك الۋدان قاشاتىن بولدى.
"بىزدە ەكولوگيا، جۇمىسسىزدىق جانە قاۋىپسىزدىككە قاتىستى پروبلەمالار تولىپ تۇر. كوپتەگەن جۇيەلىك پروبلەمالار پايدا بولدى. ارەكەت ەتەتىن كەز كەلدى. كەز كەلگەن ماسەلەنىڭ سوڭعى شەشىمىن تابۋدى پرەزيدەنتتىڭ موينىنا ءىلىپ قويۋ دۇرىس ەمەس دەپ سانايمىن. شەنەۋنىكتەر قوعامنىڭ وزىمەن قويان-قولتىق ارالاسا ءجۇرىپ، حالىقتىڭ تالابىن بىرلەسىپ شەشۋ جولىندا العا باسۋى قاجەت... بارلىعى وزگەرىس پەن دامۋدى قالايدى. بىرەۋ ونى شەتەلدەن ىزدەيدى، بىراق مەن ءوز ءومىرىمدى وتانىممەن بايلانىستىرامىن. ءبىزدىڭ بۋىن كوپتەگەن ماسەلەلەردى شەشە الادى جانە قازاقستاندى دامۋ مەن زاڭدىلىق جولىنا باعىتتاي الادى!"- دەپ قورىتىندىلادى اسەت ماتاەۆ.
اتاپ وتىلگەندەي، ءا. ماتاەۆتى جاستار وكىلدەرى، قوعام قايراتكەرلەرى، ونەر ادامدارى، ءارتۇرلى وڭىرلەردە باق سالاسىندا جۇمىس ىستەيتىن ارىپتەستەرى قولدايدى.
