Qazaqstanda «QazTAG» pen «Fridom Finans» arasyndaǧy dauǧa qatysty sot qarauy bastaldy.
Is materialdaryna säikes «QazTAG» agenttıgınıŋ bas redaktory Ämır Qasenov «Fridom Finans» AQ-ǧa qarsy auqymdy aqparattyq nauqan ūiymdastyrdy dep aiyptaluda. Al agenttıktıŋ bas direktory Äset Mataevqa kommersiialyq ūiymdaǧy basqaru funksiialaryn tiısınşe oryndamaǧany üşın jäne būzaqylyq boiynşa aiyp taǧylyp otyr.
«Fridom Finans» kompaniiasynyŋ mälımdeuınşe, 2025 jyly «QazTAG» agenttıgı kompaniiaǧa qarsy aqparattyq şabuyl ūiymdastyryp, alaiaqtyq, qarjy piramidasyn qūru jäne klientterdıŋ qarajatyn zaŋsyz şyǧaru turaly aiyptaular qamtylǧan terıs sipattaǧy materialdar jariialaǧan.
Al tergeudıŋ mälımetıne säikes, «QazTAG» agenttıgınıŋ bas direktory Äset Mataev basqaruşylyq mındetterın tiısınşe oryndamai, redaksiia qyzmetıne qajettı baqylaudy qamtamasyz etpegen. Sonyŋ saldarynan tergeu deregınşe, «Fridom Finans» kompaniiasy üşın auyr zardaptarǧa äkep soqqan zaŋ būzuşylyqtarǧa jol berılgen.
Äset Mataev, sondai-aq, būzaqylyq üşın de jauapqa tartylyp otyr.
Eske salsaq, 2026 jylǧy 17 nauryzdan 18 nauryzǧa qaraǧan tünı Almaty qalasyndaǧy «Dostyk Plaza» sauda oiyn-sauyq ortalyǧynyŋ maŋynda Mataev tanysymen bırge alkogoldık ışımdık ışken küide 20 jastaǧy ekı jıgıtpen janjaldasyp, keiın ol töbeleske ūlasqan.
Tergeu mälımetınşe, Äset Mataevtyŋ äreketterıne küş qoldanumen ūştasqan, adamdar toby jasaǧan būzaqylyq degen qūqyqtyq baǧa berılıp otyr.
Būǧan deiın «Fridom Finans» kompaniiasy «QazTAG» basşylyǧy öz kınäsın moiyndaǧan jaǧdaida tatulasuǧa daiyn ekenın mälımdegen bolatyn.
