“قازتاگ” اقپارات اگەنتتىگىنىڭ باسشىسى اسە́ت ماتاەۆقا ەكى ايعا قاماۋعا الۋ تۇرىندەگى بۇلتارتپاۋ شاراسى سانكتسيالاندى، دەپ حابارلايدى "ادىرنا".
وقيعا 2026 جىلعى 17 ناۋرىزدا ورىن العان. پوليتسيا مالىمەتىنە سايكەس، ماس كۇيدە كوشەدە بولعان ازاماتتار م. مەن ر. ەكى جاس جىگىت - ا. جانە ا.-مەن جانجالعا تۇسكەن. جانجال سوزگە كەلۋدەن باستالىپ، كەيىن كولىككە زاقىم كەلتىرۋ جانە توبەلەسكە ۇلاسقان.
الايدا ماتاەۆتىڭ ادۆوكاتتارى رەنا كەريموۆا مەن ەلەنا جيگالەنوك ءجۋرناليستىڭ قىلمىسكەر ەمەس، كەرىسىنشە، جابىرلەنۋشى ەكەنىن مالىمدەدى. ولاردىڭ ايتۋىنشا، ماتاەۆ توبەلەسىپ جاتقانداردى اجىراتۋعا تىرىسقان كەزدە باسىنا مونتيروۆكامەن سوققى العان.
ادۆوكاتتار تۇسىندىرگەندەي، جانجالدىڭ تۇپكى سەبەبى – ماتاەۆتىڭ دوسى جىگىتتەردىڭ ءبىرىن قىزبەن شاتاستىرعان.
“شىنىندا دا الگى جىگىتتىڭ سىرتقى كەلبەتى وتە وعاش: ۇزىن قىزعىلت سارى شاش، قىزعىلت سارى قاس، شىنجىرلار جانە تاعى باسقالار. قاراڭعىدا، تۇنگى ساعات 02.00 شاماسىندا، دوسىمەن وتىرىستان كەيىن، سىرت جاعىنان قاراعاندا وڭاي شاتاستىرۋعا بولادى”، – دەپ جازدى رەنا كەريموۆا الەۋمەتتىك جەلىدەگى پاراقشاسىندا.
بۇعان قاراماستان، جۋرناليست سوت شەشىمىمەن ەكى ايعا قاماۋعا الىندى. الايدا وعان قاتىستى قازاقستان رەسپۋبليكاسى قىلمىستىق كودەكسىنىڭ 274-بابى (كورىنەۋ جالعان اقپارات تاراتۋ) بويىنشا قىلمىستىق قۋدالاۋ توقتاتىلدى.
مەديتسينالىق تەكسەرۋ ناتيجەسىندە ماتاەۆتىڭ باس سۇيەگىندە جاراقاتتار انىقتالعان: اشىق جارا، سول جاق ماڭداي قويناۋىنىڭ الدىڭعى جانە تومەنگى قابىرعاسىنىڭ سىنۋى، گەموسينۋس، سول جاق ماڭداي تۇسىنا سوققى العان.
پوليتسيا وقيعاعا قاتىسقان بارلىق ازاماتتاردى انىقتاپ، ۇستاپ وتىر. قۇقىق قورعاۋ ورگاندارى جانجالعا قاتىسقانداردىڭ ارەكەتىنە قۇقىقتىق باعا بەرىپ، كىنالىلەر زاڭ الدىندا جاۋاپ بەرەتىنىن ەسكەرتتى.
ايتا كەتەيىك، شابۋىل ماتاەۆ پەن “قازتاگ” باس رەداكتورى ءامىر قاسەنوۆكە قاتىستى قىلمىستىق قۋدالاۋ اياسىندا ورىن العان. پوليتسيا قوعامدىق ورىنداردا كۇش قولدانۋ ارقىلى ماسەلە شەشۋگە جول بەرىلمەيتىنىن تاعى دا ەسكە سالدى.ت م
