قارجى ءمينيسترىنىڭ ورىنباسارى ەرجان ءبىرجانوۆ ازاماتتار اراسىنداعى قاراپايىم اقشا اۋدارىمدارى كاسىپكەرلىك قىزمەت رەتىندە قاراستىرىلمايتىنىن جانە سالىقتىق باقىلاۋعا جاتپايتىنىن ايتتى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، كوفە، تۇسكى اس ءۇشىن تولەم، تۋىستارعا كومەكتەسۋ نەمەسە قايىرىمدىلىق ماقساتىنداعى اۋدارىمدار سىندى كۇندەلىكتى قارجىلىق وپەراتسيالار باقىلاۋ تەتىكتەرىنە ىلىنبەيدى.
ۆيتسە-ءمينيستردىڭ سوزىنشە، باقىلاۋ جۇيەسى زاڭنامادا ناقتى بەكىتىلگەن، ال ۇلتتىق بانك ءتيىستى ەرەجەلەردى بەكىتكەن. بانكتەردەن الىناتىن مالىمەتتەر تەك تاۋەكەل بەلگىلەرىنە سايكەس كەلەتىن وپەراتسيالار بويىنشا سالىق ورگاندارىنا بەرىلەدى.
ء«بىز بانكتەردەن ءبىرىنشى توقسان بويىنشا دەرەكتەردى الامىز. ياعني “قىزىل جالاۋشا” بەلگىلەرىنە ىلىنگەن وپەراتسيالار عانا سالىق ورگاندارىنا جولدانادى»، — دەدى ەرجان ءبىرجانوۆ.
ونىڭ ايتۋىنشا، بۇل مالىمەتتەر كامەرالدىق باقىلاۋ اياسىندا قاراستىرىلادى. قاجەت بولعان جاعدايدا ازاماتتارعا تۇسىنىكتەمە بەرۋ نەمەسە سالىق ەسەپتىلىگىن ۇسىنۋ تۋرالى حابارلاما جىبەرىلەدى.
مينيسترلىك وكىلىنىڭ ايتۋىنشا، جاڭا جۇيە بويىنشا قاراپايىم تۇرمىستىق اۋدارىمدار — تۋعان كۇن، وتباسىلىق ءىس-شارالار نەمەسە ۇجىمدىق جيناقتار — كاسىپكەرلىك قىزمەت رەتىندە تانىلمايدى.
سونىمەن قاتار، 2026 جىلدىڭ 1 قاڭتارىنان باستاپ ءموبيلدى اۋدارىمداردى باقىلاۋعا قاتىستى جاڭا كريتەريلەر ەنگىزىلەدى. ەگەر ءبىر تۇلعاعا ءۇش اي قاتارىنان 100 جانە ودان دا كوپ ءارتۇرلى ادامنان اقشا تۇسسە جانە جالپى سوما 12 ەڭ تومەنگى جالاقىدان (1 020 000 تەڭگە) اسسا، سالىق ورگاندارى قوسىمشا تەكسەرۋ جۇرگىزۋى مۇمكىن.
